មនុស្ស៥នាក់ក្នុងយានជ្រមុជទឹក Titan នៅសល់ខ្យល់ដកដង្ហើមត្រឹម ៤០ម៉ោងទៀតប៉ុណ្ណោះ

មនុស្ស៥នាក់នៅក្នុងយានជ្រមុជទឹក ដែលបាត់ខ្លួនជិតខ្មោចកប៉ាល់ Titanic នៅសល់ខ្យល់ដកដង្ហើមបានត្រឹម៤០ម៉ោងទៀតប៉ុណ្ណោះ។ នេះបើតាមការបញ្ជាក់ពីឆ្មាំសមុទ្រអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងការផ្តល់ព័ត៌មានចុងក្រោយនៅម៉ោង៦ល្ងាចថ្ងៃអង្គារទី២០ខែមិថុនា កាពីទែន Jamie Frederick បាននិយាយថា ការស្វែងរកយានជ្រមុជទឹកឈ្មោះ Titan នៅក្នុងមហាសមុទ្រអាត្លង់ទិក មិនទាន់ទទួលបានផ្លែផ្កាអ្វីឡើយ គិតត្រឹមពេលនេះ។

ក្នុងប្រតិបត្តិកានោះ នាវាស្វែងរកជាច្រើន បូករួមទាំងយានក្រោមទឹកដែលដំណើរការពីចម្ងាយ (ROV) ផងដែរ ត្រូវបានដាក់ពង្រាយនៅកន្លែង និងមានបំពាក់កាមេរានៅលើនោះទៀតផង។

លោក Frederick បានប្រាប់អ្នកយកព័ត៌មានថា ក្រុមការងារមួយ ត្រូវបានបង្កើតឡើង ដែលមានការចូលរួមពីអ្នកជំនាញមកពីឆ្មាំឆ្នេរសមុទ្រសហរដ្ឋអាមេរិក កងទ័ពជើងទឹកសហរដ្ឋអាមេរិក កងកម្លាំងប្រដាប់អាវុធកាណាដា និងឆ្មាំរបស់ក្រុមហ៊ុន Ocean Gate Expeditions ដែលជាម្ចាស់របស់យានជ្រមុជទឹក Titan ផ្ទាល់។ លោកបន្តថា ចាប់តាំងពីថ្ងៃអាទិត្យមក កិច្ចខិតខំប្រឹងប្រែងស្វែងរករួមគ្នា បានគ្របដណ្តប់លើផ្ទៃសមុទ្រទំហំ ១៩,៦៨៣ គីឡូម៉ែត្រការ៉េ។

លោក Frederick បន្ថែមថា ការរួមបញ្ចូលគ្នានៃកិច្ចខិតខំប្រឹងប្រែងស្វែងរកទាំងនៅផ្ទៃខាងលើ និងផ្ទៃខាងក្រោម បានធ្វើឲ្យវាក្លាយប្រតិបត្តិការដ៏ស្មុគស្មាញ។

យោងតាមការបញ្ជាក់ពីក្រុមហ៊ុន, យានជ្រមុជទឹក Titan ត្រូវបានមួលភ្ជាប់ជាមួយនឹងប៊ូឡុងពីខាងក្រៅ ដែលនេះមានន័យថា អ្នកជិះក្នុងនោះមិនអាចចេញក្រៅបានឡើយ លុះត្រាតែអ្នកនៅខាងក្រៅមួលប៊ូឡុងនោះចេញ។

គួរបញ្ជាក់ជាថ្មី យានជ្រមុជទឹក Titan បានបាត់ខ្លួនប្រហែល ១ ម៉ោង និង ៤៥នាទី ពេលវាចេញដំណើរ ទៅមើលខ្មោចកប៉ាល់ Titanic កាលពីថ្ងៃអាទិត្យទី១៨ខែមិថុនា។ មនុស្ស៥នាក់ដែលជិះក្នុងនោះមានដូចជាមហាសេដ្ឋីជនជាតិប៉ាគីស្ថានឈ្មោះ Shahzada Dawood និងកូនប្រុសវ័យជំទង់របស់គាត់ឈ្មោះ Sulaiman Dawood, មហាសេដ្ឋីជនជាតិអង់គ្លេសឈ្មោះ Hamish Harding, អ្នករុករកបារាំងដែលល្បីជាសកលឈ្មោះ Paul-Henri Nargeolet និងនាយកប្រតិបត្តិក្រុមហ៊ុន OceanGate តែម្តង ឈ្មោះ Stockton Rush៕

ប្រែសម្រួល៖ Vann Vann

ប្រភព៖ Sky

ចុចអាន៖ នាវាមុជទឹក នាំអ្នកទេសចរទៅមើលខ្មោចកប៉ាល់ Titanic កំពុងបាត់ខ្លួន ខណៈអុកស៊ីសែន នៅសល់ត្រឹម៦០ម៉ោង