រុស្ស៊ី៖ ចូលមកណាតូ យើងត្រៀមរួចហើយ!

រដ្ឋមន្ត្រីការបរទេសរុស្ស៊ីលោក Sergey Lavrov បាននិយាយនៅថ្ងៃពុធទី២១ខែមិថុនាថា ប្រទេសរុស្ស៊ី បានត្រៀមខ្លួនរួចហើយ ចំពោះការដែលអង្គការណាតូ បន្តប្រយុទ្ធនៅប្រទេសអ៊ុយក្រែន។ លោកលើកឡើងបែបនេះ ប៉ុន្មានថ្ងៃ បន្ទាប់ពីអគ្គលេខាធិការអង្គការណាតូ លោក Jens Stoltenberg បានច្រានចោលរាល់វិធានការទប់ស្កាត់ជម្លោះ ថ្វីបើខាងអ៊ុយក្រែន មានទាហានស្លាប់ច្រើននាក់ក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសន៍ជាមួយកាសែតអាល្លឺម៉ង់ Welt am Sonntag ដែលចេញផ្សាយកាលពីថ្ងៃចុងសប្តាហ៍ លោក Stoltenberg បានប្រកាសថា សន្តិភាពមិនអាចមានន័យថាជាការបញ្ឈប់ជម្លោះ និងការទទួលយកកិច្ចព្រមព្រៀងដែលកំណត់ដោយរុស្ស៊ីនោះទេ។ មានតែអ៊ុយក្រែនប៉ុណ្ណោះ ដែលអាចកំណត់លក្ខខណ្ឌសមរម្យបាន។

ជាការឆ្លើយតប លោក Lavrov បានប្រាប់សន្និសីទសារព័ត៌មានមួយថា “បើដូចមាត់ប្រមុខណាតូលោក Stoltenberg និយាយថា ពួកគេប្រឆាំងនឹងការបញ្ឈប់ជម្លោះនៅអ៊ុយក្រែនមែននោះ ច្បាស់ណាស់ពួកគេចង់ប្រយុទ្ធហើយ។ មែនហើយ ឲ្យពួកគេប្រយុទ្ធចុះ យើងត្រៀមខ្លួនរួចជាស្រេចសម្រាប់រឿងនេះ យើងដឹងយូរមកហើយអំពីគោលដៅរបស់អង្គការណាតូ អំពីស្ថានភាពអ៊ុយក្រែន”។

គួរបញ្ជាក់ថា ក្រុមមន្ត្រីនៅទីក្រុងមូស្គូ បានចោទប្រកាន់សហរដ្ឋអាមេរិក និងសម្ព័ន្ធមិត្តណាតូជាយូរមកហើយថា បានបំពាក់អាវុធឲ្យអ៊ុយក្រែន និងប្រើប្រាស់ប្រទេសនេះដើម្បីបង្កជម្លោះជាមួយរុស្ស៊ី។

ទន្ទឹមនោះ ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានចាត់ទុកជម្លោះនេះថា ជាការដាក់កម្លាំងរបស់គាត់ប្រឆាំងនឹងម៉ាស៊ីនយោធាលោកខាងលិចទាំងមូល៕

ប្រែសម្រួល៖ Vann Vann

ប្រភព៖ RT

ចុចអាន៖ រុស្ស៊ី ចោទ អាមេរិក ថា កំពុងរៀបផែនការ ប្រើសត្វមូសធ្វើជាអាវុធ សម្លាប់ទាហានរបស់ខ្លួន