រុស្ស៊ី ប្ដូរឈ្មោះថ្ងៃទី៣ ខែកញ្ញា ទៅជា ទិវាជ័យជម្នះលើ “យោធានិយមជប៉ុន” និងការបញ្ចប់សង្គ្រាមលោកលើកទីពីរ

សមាជិកសភារុស្ស៊ីបានអនុម័តសេចក្តីព្រាងច្បាប់មួយដើម្បីផ្លាស់ប្ដូរឈ្មោះថ្ងៃទី៣ ខែកញ្ញា ទៅជាទិវានៃជ័យជម្នះលើ “យោធានិយមជប៉ុន” និងការបញ្ចប់សង្គ្រាមលោកលើកទីពីរ ។

សភាជាន់ទាបរបស់រុស្ស៊ី ឬហៅថា សភា Duma កាលពីថ្ងៃអង្គារ បានអនុម័តលើសេចក្តីព្រាងច្បាប់មួយនេះ បន្ទាប់ពីត្រូវបានដាក់ស្នើទៅកាន់សភាកាលពីខែមិថុនាឆ្នាំមុន ខណៈខួប​នេះក៏​ត្រូវ​បាន​​ហៅ​ផងដែរថាជា ​ថ្ងៃ​បញ្ចប់​សង្គ្រាម​លោក​លើក​ទី​ពីរ ។

អ្នកតាក់តែងច្បាប់នេះបានពន្យល់ថា ប្រទេសជប៉ុនបានដាក់ចេញ “យុទ្ធនាការមិនមែនសម្ព័ន្ធមិត្ត” មិនធ្លាប់មានពីមុនមកប្រឆាំងនឹងរុស្ស៊ី ក្នុងការសម្របសម្រួលជាមួយលោកខាងលិច ។ ពួកគេបានលើកឡើងពីការដាក់ទណ្ឌកម្មរបស់ជប៉ុនប្រឆាំងនឹងរុស្ស៊ី រួមទាំងការប្រឆាំងនឹងមន្ត្រីរដ្ឋាភិបាល ជាពិសេសគឺការបង្កកទ្រព្យសម្បតិ្តពីសំណាក់ប្រទេសជប៉ុនទៅលើធនាគារកណ្ដាលរុស្ស៊ី ។

អ្នកតាក់តែងច្បាប់លើកឡើងទៀត​ថា ការ​ប្តូរ​ឈ្មោះ​ថ្ងៃ​នេះ​គឺ​ជា​ការ​ឆ្លើយ​តប​មួយ​ចំពោះ​​ទង្វើ​មិន​មែនសម្ព័ន្ធមិត្ត​របស់​ជប៉ុន ហើយសេចក្តីព្រាងច្បាប់នេះ រំពឹងថានឹងត្រូវបង្កើតជាច្បាប់ផ្លូវការ បន្ទាប់ពីវាត្រូវបានអនុម័តដោយសភាជាន់ខ្ពស់ និងចុះហត្ថលេខាដោយប្រធានាធិបតី វ្ល៉ាឌីមៀរ ពូទីន ។

គួរបញ្ជាក់ថា រដ្ឋាភិបាលរបស់លោក ពូទីន បានកំណត់ដាក់ជប៉ុនជាប្រទេស “មិនមែនសម្ព័ន្ធមិត្ត” រួមជាមួយនឹងសហរដ្ឋអាមេរិក និងបណ្តាប្រទេសអឺរ៉ុបដែលបានបង្កើនការដាក់ទណ្ឌកម្មប្រឆាំងនឹងរុស្ស៊ី ជាការឆ្លើយតបទៅនឹងសង្គ្រាមលុកលុយរបស់ទីក្រុងមូស្គូលើអ៊ុយក្រែន ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ រុស្ស៊ី ថា ប្រតិបត្តិការកម្ចាត់កងទ័ព អ៊ុយក្រែន ត្រូវបានបញ្ចប់