វីដេអូចុងក្រោយ មុនយានជ្រមុជទឹកបាត់ខ្លួន ថតបានដោយស្ត្រីម្នាក់

យានជ្រមុជទឹក Titan បានបាត់ខ្លួនប្រហែលមួយម៉ោង និង ៤៥នាទី ពេលវាចេញដំណើរ ទៅមើលខ្មោចកប៉ាល់ Titanic កាលពីថ្ងៃអាទិត្យទី១៨ ខែមិថុនា ។ មកទល់ពេលនេះគេមិនទាន់រកឃើញយាននៅឡើយទេ ចំណែកអុកស៊ីសែនក៏ជិតអស់ទៀត ។

មុនចេញដំណើរ Abbie Jackson វ័យ ២២ ឆ្នាំ ដែលធ្វើការជាអ្នកថតវីដេអូឲ្យក្រុមហ៊ុន OceanGate បានបង្ហោះឃ្លីបយានជ្រមុជទឹកមុនបាត់ខ្លួនចូលទៅក្នុង Tik-Tok និងភ្ជាប់ជាមួយចំណងជើងថា “កំពុងមើលយានជ្រមុជទឹកចុះទៅកាន់កប៉ាល់ Titanic” ។

ទន្ទឹមនេះ Abbie ក៏បានថតអ្នកដំណើរម្នាក់ដែលកំពុងបាត់ខ្លួនក្នុងចំណោមអ្នកដំណើរទាំង ៥ នាក់ឈ្មោះ Paul Henri Nargeolet ផងដែរ ។ លោក Paul វ័យ ៧៧ ឆ្នាំ មានរហស្សនាមថា “លោក Titanic” ព្រោះគាត់ធ្លាប់ចុះទៅមើលកប៉ាល់ Titanic ដល់ទៅ ៣៧ ដងឯណោះ ។

ដោយឡែកលោក Michael Harris អ្នកជំនាញជ្រមុជទឹកបានប្រាប់ទូរទស្សន៍ Fox News ថា យានជ្រមុជទឹក​ Titan អាចនឹងផ្ទុះនៅផ្ទៃខាងក្រោមជម្រៅជាង ៣,០០០ ម៉ែត្រ ហើយអ្នកជិះក្នុងនោះ ស្លាប់យូរមកហើយ ។ យ៉ាងណាក្រុមស្វែងរកនៅតែខិតខំធ្វើការងារ ទោះបីមិនសូវមានសង្ឃឹមក៏ដោយ ៕

ប្រែសម្រួល៖ វារី

ប្រភព៖ dailymail

ចុចអាន៖ មូលហេតុអាចបណ្តាលឲ្យ យានជ្រមុជទឹក បាត់ខ្លួនពេលចុះទៅតំបន់ខ្មោចកប៉ាល់ Titanic