ក្រុមសង្គ្រោះកំពុងឆ្ងល់ថា សំឡេងគោះដ៏អាថ៌កំបាំងនៅបាតសមុទ្រ រៀងរាល់៣០នាទីម្តង ចេញមកពីណា?

គេសន្មត់ថា មនុស្សទាំង៥នាក់នៅក្នុងយានជ្រមុជទឹក Titan បានស្លាប់អស់ហើយ បន្ទាប់ពីការផ្ទុះដ៏មហន្តរាយ ដោយសារតែសម្ពាធយ៉ាងខ្លាំងនៅក្នុងមហាសមុទ្រទឹកជ្រៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃអាទិត្យទី១៨ខែមិថុនា យានរបស់ក្រុមហ៊ុនអាមេរិក OceanGate បានចាប់ផ្តើមការជ្រមុជទឹក ចុះទៅតំបន់ខ្មោចកប៉ាល់ទីតានិក ប៉ុន្តែវាបានបាត់ទំនាក់ទំនងទាំងអស់ ជាមួយកប៉ាល់នៅផ្ទៃខាងលើ ក្រោយចេញដំណើរបានរយៈពេលជាងមួយម៉ោង។

នៅពេលក្រុមការងារចាប់ផ្តើមការស្វែងរកដំបូង សំឡេងត្រូវចាប់សញ្ញាបាន រៀងរាល់៣០នាទីម្តង ដោយឧបករណ៍សូណានៅបាតមហាសមុទ្រ។

ដំបូងឡើយ គេប៉ាន់ស្មានថា នោះគឺជាសំឡេងដែលអ្នកជិះក្នុងយានជ្រមុជទឹក Titan គោះសុំជំនួយ ជាហេតុនាំឲ្យក្រុមការងារសង្ឃឹមថា ពួកគេនៅមានជីវិតហើយរង់ចាំការជួយសង្គ្រោះ។

ប៉ុន្តែក្រោយមក កងទ័ពជើងទឹកបានទម្លាយថា ប្រព័ន្ធចាប់សញ្ញាសូរស័ព្ទសម្ងាត់របស់ខ្លួន បានរកឃើញសំឡេងមិនធម្មតា នៅមហាសមុទ្រអាត្លង់ទិកភាគខាងជើង ដែលទំនងជាការផ្ទុះយានជ្រមុជទឹក Titan តាំងតែពីថ្ងៃអាទិត្យមកម្ល៉េះ។

ដូច្នេះបើយាននោះផ្ទុះតាំងពីថ្ងៃអាទិត្យមកមែន អ៊ីចឹង​ តើសំឡេងគោះសុំជំនួយដែលគេឮរៀងរាល់៣០នាទីម្តង គឺជាសំឡេងអ្វី ហើយមានប្រភពចេញពីណា?

យោងតាមអ្នកជំនាញ សំឡេងនោះ អាចចេញពីឧបករណ៍ស្វែងរកក្នុងតំបន់ ឬជីវិតក្នុងមហាសមុទ្រដូចជាត្រីបាឡែន ប៉ុន្តែ វេជ្ជបណ្ឌិត Jamie Pringle អ្នកជំនាញនៅសាកលវិទ្យាល័យ Keele គិតថា សំឡេងនោះគឺមនុស្សគោះ។ 

លើសពីនេះ មានអ្នកជំនាញជាច្រើនបានធ្វើការសន្និដ្ឋានផ្សេងៗគ្នាអំពីសំឡេងនោះ ដែលជាហេតុបង្កឲ្យមានការងឿងឆ្ងល់។

ទោះបីជាយ៉ាងណាក៏ដោយ មកទល់ពេលនេះ ក្រុមអ្នកជំនាញកំពុងធ្វើការកំណត់ឲ្យបានជាក់លាក់ថាតើ នោះគឺជាសំឡេងអ្វី ហើយមានប្រភពចេញពីណាឲ្យប្រាកដ៕

ប្រែសម្រួល៖ Vann Vann

ប្រភព៖ Daily Mail, Aljazeera

ចុចអាន៖ កុំច្រឡំ! រូបភាពដែលចែកចាយពេញបណ្តាញសង្គម មិនមែនជាបំណែកយានជ្រមុជទឹក Titan ទេ