ទីផ្សារទេសចរណ៍ទៅមើលខ្មោចកប៉ាល់ Titanic នៅតែត្រូវប៉ាន់ ទោះមាន​សោកនាដកម្មស្លាប់មនុស្សក្នុងយាន Titan

អតីតមេបញ្ជាការនាវាមុជទឹកអូស្ត្រាលីលោក Frank Owen ជឿជាក់ថា ទីផ្សារសម្រាប់ទេសចរណ៍ក្នុងសមុទ្រទឹកជ្រៅ ជាពិសេសដំណើរកម្សាន្តទៅមើលខ្មោចកប៉ាល់ Titanic នៅតែបន្តមានហាងឆេង ទោះបីជាមានសោកនាដកម្មស្លាប់មនុស្សក្នុងយានជ្រមុជទឹក Titan ក៏ដោយ ។

មន្ត្រីកងទ័ពជើងទឹកដែលចូលនិវត្តន៍រូបនេះបានប្រាប់សារព័ត៌មាន Sky News ថា ទីផ្សារទេសចរណ៍មួយនេះនឹងនៅតែបន្តមានការគាំទ្រ ប៉ុន្តែអ្នកធ្វើដំណើរកម្សាន្តអាចជ្រើសរើសយកវិធីផ្សេងក្នុងការសម្រេចចិត្តចុះទៅបាតសមុទ្រ ។

លោក Owen បានលើកឡើងថា ក្រោយសោកនាដកម្មនេះ អ្នកដំណើរអាចនឹងធ្វើការសម្រេចហ្មត់ចត់ក្នុងការជ្រើសរើសយានដែលត្រូវបានទទួលស្គាល់ជាផ្លូវការ មុនពេលចាប់ផ្ដើមធ្វើដំណើរកម្សាន្តណាមួយទៅកាន់បាតសមុទ្រទឹកជ្រៅ ។

ទន្ទឹមនោះ លោកក៏បានបញ្ជាក់ផងដែរថា “យានជ្រមុជទឹកមកពីក្រុមហ៊ុន OceanGate គឺមិនមានស្តង់ដារនោះទេ ហើយអ្នកដែលចង់ធ្វើដំណើរទៅសមុទ្រទឹកជ្រៅ ត្រូវតែប្រាកដថា មានការប្រុងប្រយ័ត្នក្នុងការសម្រេចិត្តជ្រើសរើស ដោយសារតែមានមេរៀនពីយានជ្រមុជទឹក Titan ស្រាប់ហើយ” ។

គួរបញ្ជាក់ថា បើយោងតាមការបញ្ជាក់ពីឆ្មាំសមុទ្រអាមេរិក អ្នកដំណើរក្នុងយានជ្រមុជទឹក Titan ចំនួន ៥ នាក់បានស្លាប់អស់ហើយ ដោយសារតែការផ្ទុះដ៏មហន្តរាយ ដែលធ្វើឲ្យពិភពលោកសម្ដែងការភ្ញាក់ផ្អើល ជាពិសេសក្រុមគ្រួសារជនរងគ្រោះមានខូចចិត្តជាខ្លាំង ៕

ប្រែសម្រួលដោយ ៖ ជីវ័ន្ត

ប្រភព ៖ Sky News

ចុចអាន ៖ មហាសេដ្ឋីអង់គ្លេសដែលស្លាប់ក្នុងយាន Titan មានកាន់កាប់កំណត់ត្រាពិភពលោក ដល់ទៅ៣