ទីក្រុងមូស្គូ បន្តរឹតបន្តឹងសន្តិសុខ ទោះមេក្រុមទាហានស៊ីឈ្នួល និរទេសទៅប្រទេស បេឡារុស

កាលពីថ្ងៃអាទិត្យទី២៥ខែមិថុនា ក្រុមទាហានស៊ីឈ្នួល Wagner បានវិលត្រលប់ទៅមូលដ្ឋានរបស់ពួកគេវិញ បន្ទាប់ពីប្រធានាធិបតីរុស្ស៊ី លោក វ្ល៉ាឌីមៀរ ពូទីន យល់ព្រមអនុញ្ញាតឲ្យមេដឹកនាំ Yevgeny Prigozhin របស់ពួកគេ ចៀសផុតការចោទប្រកាន់ពីបទក្បត់ជាតិ និងទទួលយកការនិរទេសខ្លួនទៅនៅប្រទេសជិតខាងគឺ បេឡារុស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចព្រមព្រៀងនេះបានបញ្ឈប់វិបត្តិដ៏ធ្ងន់ធ្ងរមួយ ប៉ុន្តែអ្នកវិភាគនិយាយថា ការបះបោររបស់ក្រុម Wagner បានលាតត្រដាងឲ្យឃើញពីការគ្រប់គ្រងរបស់លោកពូទីន មានភាពផុយស្រួយជាងការគិត។

ទោះបីជាយ៉ាងណាក៏ដោយ វិធានការសន្តិសុខ នៅតែរឹតបន្តឹងក្នុងទីក្រុងមូស្គូថ្វីបើមានប៉ូលិសតិចជាងមុនក៏ដោយ ហើយអ្នកធ្វើដំណើរឆ្លងកាត់និយាយថា ពួកគេមិនមានការព្រួយបារម្ភទៀតទេ។

លោក Prigozhin ត្រូវបានគេឃើញចុងក្រោយកាលពីយប់ថ្ងៃសៅរ៍ នៅក្នុងរថយន្ត SUV ចាកចេញពីទីក្រុង Rostov-on-Don ហើយរថ​ពាសដែក បានបើក​តាមពីក្រោយ​រថយន្ត​របស់​គាត់។

តាមសេចក្តីរាយការណ៍ដំបូង, អ្នកប្រយុទ្ធ Wagner នៅសល់ចម្ងាយត្រឹមតែ៤០០ គីឡូម៉ែត្រទៀតប៉ុណ្ណោះពីទីក្រុងមូស្គូ ខណៈលោក Prigozhin ខ្លួនគាត់ផ្ទាល់ បានអះអាងថា មិនដល់២៤ម៉ោងទៀតទេ យើងនឹងវាយចូលចម្ងាយ២០០គីឡូម៉ែត្រពីទីក្រុងមូស្គូ។

ដំបូងលោក ពូទីន បានថ្កោលទោសការបះបោរនេះថាជាអំពើក្បត់ជាតិ ដោយប្តេជ្ញាថានឹងដាក់ទោសជនល្មើស។ លោក​បាន​ចោទប្រកាន់​ពួកគេ​ថា​ បាន​រុញច្រាន​រុស្ស៊ី​ ឲ្យ​ធ្លាក់ចូល​សង្រ្គាម​ស៊ីវិល។

ក្រោយមកនៅថ្ងៃដដែលនោះ លោកបានទទួលយកកិច្ចព្រមព្រៀងមួយ ដែលសម្របសម្រួលដោយប្រទេសបេឡារុស ដើម្បីបញ្ចៀសវិបត្តិសន្តិសុខដ៏ធ្ងន់ធ្ងរបំផុតរបស់ទីក្រុងមូស្គូក្នុងរយៈពេលប៉ុន្មានទសវត្សរ៍មកនេះ៕

ប្រែសម្រួល៖ Vann Vann

ប្រភព៖ CNA

ចុចអាន៖ ស្ថានការណ៍នៅរុស្ស៊ី កាន់តែមិនស្រួល