លោក Medvedev ប្រាប់ពីគោលបំណងរបស់ក្រុមបះបោរប្រដាប់អាវុធនៅ រុស្ស៊ី

លោក Dmitry Medvedev អនុប្រធានក្រុមប្រឹក្សាសន្តិសុខរុស្ស៊ី បាននិយាយថា ការបះបោរប្រដាប់អាវុធពីសំណាក់មេទាហានស៊ីឈ្នួល Wagner Group នៅក្នុងប្រទេសរុស្ស៊ីដែលបានកើតឡើងកាលពីថ្ងៃសៅរ៍កន្លងទៅ គឺជាប្រតិបត្តិការដែលរៀបចំឡើងដើម្បីកាន់អំណាច ។

លោកបានប្រាប់អ្នកសារព័ត៌មានថា “វាច្បាស់ណាស់ នេះគឺជាប្រតិបត្តិការដែលបានគិតគូរ និងគ្រោងទុកយ៉ាងល្អ ក្នុងគោលបំណងដើម្បីដណ្តើមអំណាចនៅក្នុងប្រទេសរុស្ស៊ី” ។

លោក Medvedev បានសង្កត់ធ្ងន់ថា “ការលាតត្រដាងនៃព្រឹត្តិការណ៍បច្ចុប្បន្នបង្ហាញពី សកម្មភាពរបស់បុគ្គលដែលរៀបចំការបះបោរប្រដាប់អាវុធ បូករួមជាមួយនឹងផែនការនៃរដ្ឋប្រហារដែលបានគិតទុកជាមុន និងរៀបចំយ៉ាងល្អ” ។

លោក Medvedev បានសង្កត់ធ្ងន់ថា នេះក៏ជាមូលហេតុពិតមួយដែលបង្ហាញពីការអសមត្ថភាពរបស់ក្រសួងការពារជាតិក្នុងការបំពេញកាតព្វកិច្ចមួយចំនួន និងអំពើពុករលួយរបស់មន្ត្រីដែលជាប់ពាក់ព័ន្ធក្នុងរឿងរ៉ាវមួយនេះ ហើយលោក ក៏​បាន​លើក​ឡើង​​អំពី​ផល​វិបាក​ដ៏​អាក្រក់​នៃ​ការ​បះបោរនេះផងដែរ ។

លោក Medvedev បាននិយាយថា “យើងដឹងយ៉ាងច្បាស់ហើយអំពីផលវិបាកនៃរដ្ឋប្រហារនៅក្នុងប្រទេសមហាអំណាចនុយក្លេអ៊ែរដ៏ធំបំផុតមួយនេះ ។ ក្នុងប្រវត្តិសាស្រ្តមនុស្សជាតិគឺមិនធ្លាប់មាននោះទេ ដែលក្រុមចោរជាអ្នកគ្រប់គ្រងឃ្លាំងអាវុធនុយក្លេអ៊ែរនោះ ហើយប្រសិនបើរឿងនេះកើតឡើងមែននោះ ពិភពលោក​នឹងធ្លាក់ចូលទៅក្នុង​ការ​វិនាស​អន្តរាយ” ។

ជាចុងក្រោយ អនុប្រធានក្រុមប្រឹក្សាសន្តិសុខបានរូបនេះប្ដេជ្ញាថា នឹងមិនអនុញ្ញាតឲ្យមានព្រឹត្តិការណ៍ដែលធ្វើតាមសេណារីយ៉ូបែបនេះកើតឡើងម្ដងទៀតនោះទេ បើទោះបីជាឧក្រិដ្ឋជន និងអ្នកដើរតាមពួកគេចង់ឃើញព្រឹត្តិការណ៍មួយនេះក្លាយជាការពិតក៏ដោយ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ មេទាហានស៊ីឈ្នួល រុស្ស៊ី ចេញមុខបកស្រាយរឿងចោទធ្វើរដ្ឋប្រហារ