អាមេរិក ថា ការបះបោរប្រដាប់អាវុធរបស់ទាហានស៊ីឈ្នួលបង្ហាញពីភាព​បែកបាក់ក្នុងប្រទេស រុស្ស៊ី

រដ្ឋមន្ត្រីការបរទេសសហរដ្ឋអាមេរិកលោក Antony Blinken បាននិយាយថា ស្ថានភាពជុំវិញការបះបោរប្រដាប់អាវុធកាលពីចុងសប្ដាហ៍ដោយក្រុមទាហានស៊ីឈ្នួលរុស្ស៊ី Wagner Group បានលាតត្រដាងយ៉ាងច្បាស់អំពីការបែកបាក់ដ៏ធ្ងន់ធ្ងរមួយចំនួននៅក្នុងប្រទេសរុស្ស៊ី ។

អ្នកការទូតកំពូលរបស់អាមេរិករូបនេះបាននិយាយនៅក្នុងបទសម្ភាសន៍ជាមួយសារព័ត៌មាន ABC News កាលពីថ្ងៃអាទិត្យថា លោកបានពិភាក្សាអំពីសកម្មភាពរបស់ក្រុមទាហានស៊ីឈ្នួលរុស្ស៊ី Wagner Group ទាំងមុនពេលឆ្ពោះទៅកាន់ទីក្រុងមូស្គូ និងដកកម្លាំងមកវិញ ក្រោមបញ្ជាដោយមេដឹកនាំលោក Yevgeny Prigozhin ។

លោក Blinken បាននិយាយថា ចលនារបស់ក្រុម Wagner មិនមែនជារឿងគួរឲ្យភ្ញាក់ផ្អើលនោះទេ ដោយសារតែភាពតានតឹងបាននិងកំពុងកើនឡើងជាច្រើនខែមកហើយ ដោយសារតែការរិះគន់ជាសាធារណៈរបស់លោក Prigozhin ទៅលើរដ្ឋបាលរបស់ប្រធានាធិបតីរុស្ស៊ី វ្ល៉ាឌីមៀរ ពូទីន ។

លោករដ្ឋមន្ត្រីការបរទេសរូបនេះបញ្ជាក់ថា ការបះបោរដែលស្ថិតនៅក្រោមការបញ្ជាពីលោក Prigozhin គឺជាការគំរាមកំហែងដោយផ្ទាល់ទៅលើការដឹកនាំរបស់លោក ពូទីន ជាពិសេសជុំវិញការលើកឡើងរបស់រដ្ឋមន្ត្រីការពារជាតិរុស្ស៊ីលោក Sergei Shoigu ឲ្យបើកការវាយប្រហារសម្លាប់ទាហានស៊ីឈ្នួលនៅក្នុងប្រទេសអ៊ុយក្រែន ។

លោក Blinken បាននិយាយថា សង្គ្រាមលុកលុយនៅលើទឹកដីអ៊ុយក្រែន បានធ្វើឲ្យរុស្ស៊ី “ចុះខ្សោយ” ទាំងផ្នែកសេដ្ឋកិច្ច និងយោធា ហើយជាមួយនឹងការបែកបាក់ផ្ទៃក្នុងនៅរុស្ស៊ី វាមិនអាចទៅរួចទេក្នុងការប៉ាន់ស្មានថាតើស្ថានភាពទៅជាយ៉ាងណា ប៉ុន្តែ​លោក​បាន​សង្កត់​ធ្ងន់​ថា អាមេរិកនៅតែ​ផ្តោតលើបញ្ហានៅ​អ៊ុយក្រែន ។

ទោះជាយ៉ាងណា ស្ថានភាពនៅក្នុងប្រទេសរុស្ស៊ីហាក់ស្ងប់ស្ងាត់វិញ បន្ទាប់ពីលោក Prigozhin និរទេសទៅកាន់ប្រទេសបេឡារុស ក្រោយមានកិច្ចសម្របសម្រួលពីលោក Alexander Lukashenko ដែលបានចរចារកដំណោះស្រាយជាមួយលោក ពូទីន រួចមក ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោក Medvedev ប្រាប់ពីគោលបំណងរបស់ក្រុមបះបោរប្រដាប់អាវុធនៅ រុស្ស៊ី