ចាប់ខ្លួនបុគ្គលិក​ UN ពាក់ព័ន្ធរត់ពន្ធ​គ្រឿងញៀន       

បុគ្គលិកអង្គការសហប្រជាជាតិ (UN) ចំនួន ៣ នាក់ត្រូវបានចាប់ខ្លួនពីបទព្យាយាមរត់ពន្ធកូកាអ៊ីនឆ្លងព្រំដែនប្រទេសហ្ស៊កដានី ចូលទៅក្នុងប្រទេសអ៊ីស្រាអែល ដោយបន្លំគ្រឿងញៀន និងក្លែងវាធ្វើជាធាតុផ្សំផលិតទឹកអប់ ។

យោងតាមសេចក្តីថ្លែងការណ៍រួមរបស់ប៉ូលិស និងអាជ្ញាធរពន្ធអ៊ីស្រាអ៊ែលបានឲ្យដឹងថា ជនសង្ស័យដែលធ្វើការឲ្យ UN នៅក្នុងប្រទេសស៊ីរី ត្រូវបានចាប់ខ្លួនកាលពីថ្ងៃអាទិត្យនៅជិតតំបន់ Beit She’an ខណៈដែលពួកគេព្យាយាមចូលទៅក្នុងប្រទេសអ៊ីស្រាអែលតាមច្រកព្រំដែនទន្លេហ្ស៊កដានី ហើយក្រុមអធិការកិច្ចបានរកឃើញកូកាអ៊ីនរាវនៅក្នុងសម្ភារៈផលិតទឹកអប់ ដែលបុគ្គលិក UN ត្រូវបានចោទប្រកាន់ថា ព្យាយាមនាំយកមកក្នុងប្រទេស ។

គួរឲ្យដឹងថា ជាញឹកញាប់អ្នករត់ពន្ធបានរំលាយកូកាអ៊ីនទៅជាទម្រង់រាវ ដើម្បីងាយស្រួលក្លែងបន្លំគ្រឿងញៀន ដោយដាក់វានៅក្នុងធុងដែលមានលក្ខណៈដូចជាស្រា ឬទឹកអប់ បន្ទាប់មកបំប្លែងវាទៅជាម្សៅវិញតាមគោលដៅរបស់ពួកគេ ៕

ប្រែសម្រួល ៖ នាង រតនៈ

ប្រភព ៖ RT