ណាតូ​ ព្រមានថា កុំមើលស្រាលរុស្ស៊ី ឲ្យសោះ

លោក Jens Stoltenberg អគ្គលេខាធិការអង្គការណាតូ បាននិយាយនៅថ្ងៃពុធ ទី២៨ ខែមិថុនាថា សមាជិករបស់ប្លុកមួយនេះ មិនត្រូវមើលស្រាលរុស្ស៊ីទេ ថ្វីបើប្រទេសនេះ ទើបជួបវិបត្តិរយៈពេលខ្លី ដែលបង្កឡើងដោយការបះបោររបស់ក្រុមហ៊ុនទាហានស៊ីឈ្នួល Wagner ក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Stoltenberg បាននិយាយក្នុងសន្និសីទសារព័ត៌មាននៅទីក្រុងឡាអេ នៃប្រទេសហូឡង់ថា “ប៉ុន្មានថ្ងៃនេះ យើងទាំងអស់គ្នាបានឃើញព្រឹត្តិការណ៍នៅក្នុងប្រទេសរុស្ស៊ី។ ទាំងនោះគឺជាបញ្ហាផ្ទៃក្នុងរបស់រុស្ស៊ី ការបះបោរគឺជាសញ្ញានៃភាពតានតឹងថ្មីនៅក្នុងប្រទេស។ ក្នុងពេលជាមួយគ្នានេះ យើងមិនត្រូវមើលស្រាលរុស្ស៊ីទេ”។

ស្របពេលជាមួយគ្នានោះ លោកបានបន្ថែមថា សមាជិកណាតូ នឹងបន្តផ្តល់ជំនួយផ្នែកយោធាដល់ទីក្រុងកៀវ ហើយផ្ញើសារច្បាស់លាស់នៃការប្តេជ្ញាចិត្តរបស់ខ្លួន ក្នុងកិច្ចប្រជុំកំពូលនៅប្រទេសលីទុយអានី នាខែក្រោយ។

លោក Stoltenberg បានប្រាប់អ្នកយកព័ត៌មានថា កងទ័ពអ៊ុយក្រែនកំពុងមានវឌ្ឍនភាព ក្នុងការវាយលុក ពោលគឺទីក្រុងកៀវ អាចដណ្តើមបានទឹកដីពីរុស្ស៊ីវិញ បានកាន់តែច្រើន។

ទោះបីជាយ៉ាងណាក៏ដោយ ក្រសួងការពារជាតិរុស្ស៊ីអះអាងថា កងកម្លាំងអ៊ុយក្រែនបានបរាជ័យក្នុងការវាយលុកលើខែលការពារនៅតំបន់ Donbass និងតំបន់ Zaporozhye ហើយថាទីក្រុងកៀវ ទទួលរងការខាតបង់យ៉ាងធំក្នុងការប៉ុនប៉ងនោះ។

រថក្រោះធុនធ្ងន់ Leopard 2 ផលិតដោយអាល្លឺម៉ង់ និងរថយន្តប្រយុទ្ធ Bradley ផលិតដោយសហរដ្ឋអាមេរិកជាច្រើនគ្រឿង ត្រូវបានបំផ្លាញ ឬបោះបង់ចោល អំឡុងប្រតិបត្តិការវាយលុករបស់អ៊ុយក្រែនក្នុងខែនេះ។

ដោយឡែក ងាកទៅភាពវឹកវរនៅរុស្ស៊ីវិញ កាសែត New York Times កាល​ពី​ថ្ងៃ​អាទិត្យ ទី២៥ ខែមិថុនា បាន​ដក​ស្រង់​សម្តី​មន្ត្រី​អាមេរិក​ដែល​និយាយ​ថា អ៊ុយក្រែន ​បាន​បរាជ័យ​ក្នុង​ការ​ទាញ​យក​ប្រយោជន៍​ពី​ការ​បះបោរ​​របស់ក្រុមទាហានស៊ីឈ្នួល Wagner។

ភាពចលាចលបានផ្ទុះឡើងនៅថ្ងៃសៅរ៍ ប៉ុន្តែបានបញ្ចប់ទៅវិញក្នុងរយៈពេលខ្លី ពេលដែលមេក្រុម Yevgeny Prigozhin ឈានដល់កិច្ចព្រមព្រៀងជាមួយអាជ្ញាធរ។ ចាប់តាំងពីពេលនោះមក យុទ្ធជន Wagner បានដកថយ ហើយវិលត្រលប់ទៅមូលដ្ឋានរបស់ពួកគេវិញ៕

ប្រែសម្រួល៖ Vann Vann

ប្រភព៖ RT

ចុចអាន៖ ពូទីន ព្រមានថា ណាតូ នឹងមានសង្គ្រាមបើកចំហជាមួយរុស្ស៊ី បើអ៊ុយក្រែន ទទួលបានយន្តហោះចម្បាំង F-16