ព័ត៌មានអន្ដរជាតិ

លោក ពូទីន អរគុណដល់កងទ័ព រុស្ស៊ី សម្រាប់ភារកិច្ចបញ្ឈប់សង្គ្រាមស៊ីវិល

បានផុស

២ years មុន

នៅ

ថ្ងៃពុធ ២៨ មិថុនា ២០២៣

ដោយ

ប្រធានាធិបតីរុស្ស៊ីលោក វ្ល៉ាឌីមៀរ ពូទីន បានសរសើរដល់កងកម្លាំងសន្តិសុខរបស់លោកចំពោះការបំពេញភារកិច្ចដោះស្រាយការបះបោរប្រដាប់អាវុធដែលដឹកនាំដោយមេទាហានស៊ីឈ្នួល Wagner Group លោក Yevgeny Prigozhin បានទាន់ពេលវេលា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ពូទីន បាននិយាយទៅកាន់កងកម្លាំងប្រដាប់អាវុធលើទីលាន Cathedral Square នៅវិមានក្រឹមឡាំងថា កងទ័ពរុស្ស៊ីបានការពារសណ្តាប់ធ្នាប់រដ្ឋធម្មនុញ្ញ សន្តិសុខ និងសេរីភាពប្រជាពលរដ្ឋរបស់ប្រទេស ជាពិសេសបានជួយសង្គ្រោះមាតុភូមិពីភាពចលាចល និងបញ្ឈប់សង្គ្រាមស៊ីវិលប្រកបដោយប្រសិទ្ធភាព ។

ក្នុងអំឡុងការប្រមូលផ្ដុំនោះ ប្រធានាធិបតីរុស្ស៊ីរូបនេះក៏បានអំពាវនាវឲ្យមានភាពស្ងៀមស្ងាត់មួយនាទីផងដែរ ដើម្បីឧទ្ទិសទៅដល់អ្នកបើកយន្តហោះដែលត្រូវបានសម្លាប់ដោយទាហានស៊ីឈ្នួល Wagner Group ក្នុងអំឡុងពេលប៉ះទង្គិចគ្នាកាលពីចុងសប្ដាហ៍កន្លងទៅនេះ ។

ពាក់ព័ន្ធនឹងបញ្ហានេះដែរ ក្រសួងការពារជាតិរុស្ស៊ីកំពុងត្រៀមរៀបចំដំណើរការដើម្បីផ្ទេររថពាសដែក កាំភ្លើងធំ និងអាវុធផ្សេងទៀតរបស់ក្រុមទាហានស៊ីឈ្នួល Wagner Group ទៅឲ្យកងទ័ពរុស្ស៊ីផងដែរ ។

ប៉ុន្តែទោះជាយ៉ាងណា រហូតមកដល់ពេលនេះ ស្ថានការណ៍ក្នុងប្រទេសរុស្ស៊ីហាក់ស្ងប់ស្ងាត់ បន្ទាប់ពីក្រុមទាហានស៊ីឈ្នួល Wagner Group បានសម្រេចដកថយ ជាពិសេសក្រោយមានកិច្ចសម្របសម្រួលពីលោកប្រធានាធិបតីបេឡារុស Alexander Lukashenko ដែលបានចរចារកដំណោះស្រាយជាមួយលោក ពូទីន រួចមក ៕