កម្មកររោងចក្រវៀតណាម រាប់ម៉ឺននាក់ ញៀនថ្នាំ

បច្ចុប្បន្នវៀតណាម មានអ្នកញៀនថ្នាំជាង ២៦ ម៉ឺននាក់ដែលមានអាយុពី ១៨ ដល់ ៣៥ ឆ្នាំ ហើយក្នុងចំណោមនោះ មានរាប់ម៉ឺននាក់ គឺជាកម្មករនៅសួនឧស្សាហកម្ម និងតំបន់កែច្នៃនាំចេញ ។

កាលពីថ្ងៃអង្គារ ទី២៧ ខែមិថុនា លោក Ngo Duy Hieu អនុប្រធានសហព័ន្ធការងារវៀតណាម បានចែករំលែកព័ត៌មាននេះ នៅក្នុងសន្និសីទមួយស្តីពីការការពារកម្មករពីការប្រើប្រាស់គ្រឿងញៀន ដោយនិយាយថា កម្មករទាំងនោះ ភាគច្រើនគឺចេញពីតំបន់ដាច់ស្រយាល មកធ្វើការក្នុងទីក្រុង ហើយពួកគេធុញថប់ ឬមានអារម្មណ៍តានតឹងដោយសារសម្ពាធការងារ និងជីវិតដែលនៅឆ្ងាយពីគ្រួសារ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើសពីនេះ លោក Hieu និយាយថា ការដែលរោងចក្រនានា បញ្ឈប់កម្មករនាពេលថ្មីៗនេះ បានបណ្តាលឲ្យមនុស្សជាច្រើនបាត់បង់ការងារធ្វើ នាំឲ្យពួកគេបាក់ទឹកចិត្ត និងងាកទៅរកគ្រឿងញៀនជាដំណោះស្រាយ។

ដោយឡែក លោកវរសេនីយ៍ឯក Hoang Quoc Viet អនុប្រធាននាយកដ្ឋានស៊ើបអង្កេតឧក្រិដ្ឋកម្មគ្រឿងញៀន នៃក្រសួងសន្តិសុខសាធារណៈបាននិយាយថា ប៉ូលិសបានរកឃើញសារធាតុញៀននៅក្នុងនំ និងផលិតផលថ្នាំជក់ ហើយមនុស្សជាច្រើនអាចប្រើប្រាស់វាដោយចៃដន្យ។

គួរបញ្ជាក់ថា កាល​ពី​ឆ្នាំ​មុន ប៉ូលិស​បាន​បង្ក្រាប​បទ​ល្មើស​គ្រឿង​ញៀនចំនួន ២៤ ០០០ ករណី និង​ចាប់​ខ្លួន​មនុស្ស​ជាង ៣៦ ០០០ នាក់​ពី​បទ​ល្មើស​ទាក់​ទង​នឹង​គ្រឿង​ញៀន៕

ប្រែសម្រួល៖ Vann Vann

ប្រភព៖ VN Express

ចុចអាន៖ កម្មករ ឡាវ ជាង ៦៤,០០០ នាក់កំពុងអត់ការងារធ្វើ ទោះរោងចក្រកាត់ដេរ ខ្វះបុគ្គលិកក៏ដោយ