លោក បៃដិន និយាយខុសទៀតហើយ លើកនេះ ថា ពូទីន កំពុងចាញ់សង្គ្រាមនៅ អ៊ីរ៉ាក់

ប្រធានាធិបតីអាមេរិកលោក ចូ បៃដិន បានអះអាងកាលពីថ្ងៃពុធ ទី២៨ ខែមិថុនាថា រុស្ស៊ីកំពុងចាញ់សង្រ្គាមនៅអ៊ីរ៉ាក់ ហើយប្រធានាធិបតីគឺលោក វ្ល៉ាឌីមៀរ ពូទីន គឺជាមនុស្សដែលគេទុកចោលនៅជុំវិញពិភពលោក ។

ការនិយាយខុសលើកនេះ កើតឡើងពេលលោក បៃដិន ឆ្លើយសំណួរអ្នកសារព័ត៌មាន ខណៈលោកដើរចេញពីសេតវិមាន សំដៅឧទ្ធម្ភាគចក្រប្រធានាធិបតី មុនពេលហោះហើរទៅកាន់ទីក្រុង ឈីកាហ្គោ ដើម្បីថ្លែងសុន្ទរកថាអំពីរបៀបវារៈសេដ្ឋកិច្ច Bidenomics របស់លោក។

សំណួរមួយក្នុងចំណោមសំណួរទាំងនោះគឺថាតើ លោក ពូទីន ពិតជាចុះខ្សោយ ដោយសារតែការបះបោរនាពេលថ្មីៗនេះរបស់ក្រុមហ៊ុនយោធាឯកជន Wagner មែនឬទេ?

លោក បៃដិន ឆ្លើយទាំងខុសសំណួរថា “វាពិបាកនិយាយណាស់ ប៉ុន្តែគាត់ច្បាស់ជាចាញ់សង្រ្គាមនៅអ៊ីរ៉ាក់ គាត់ចាញ់សង្រ្គាមនៅផ្ទះ ហើយគាត់បានក្លាយជាអ្នកចាញ់នៅជុំវិញពិភពលោក។ ​វា​មិន​មែនត្រឹម​តែ​ណាតូ​ទេ ហើយវាក៏មិនមែនត្រឹមតែសហភាពអឺរ៉ុបដែរ។ វាជាប្រទេសជប៉ុន វា​ជា​ប្រទេស​ចំនួន៤០”។

ការនិយាយរបស់លោក បៃដិន នេះគឺជាកំហុសមួយទៀត ក្នុងចំណោមកំហុសជាច្រើន។ កាលពីសប្តាហ៍មុន លោកបានថ្លែងបិទសុន្ទរកថានៅកិច្ចប្រជុំកំពូល National Safer Communities Summit ក្នុងរដ្ឋ Connecticut ជាមួយនឹងពាក្យថា “God save the Queen”​ ទាំងដែលពាក្យត្រូវគឺ God save the King ឯណោះទេ។

លើសពីនេះ លោកក៏ភ្លេចមុខតំណែងរបស់នាយករដ្ឋមន្ត្រីអង់គ្លេស Rishi Sunak ផងដែរ ដោយច្រឡំជាប្រធានាធិបតីទៅវិញ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT, SKY

ចុចអាន៖ លោក បៃដិន ហៅលោក ស៊ី “ជនផ្តាច់ការ” ក្រោយរដ្ឋមន្ត្រីការបរទេសអាមេរិក ធ្វើទស្សនកិច្ចទីក្រុងប៉េកាំង