វីរុសបម្លែងខ្លួនប្រេស៊ីលប្រភេទថ្មីចូលដល់ សហរដ្ឋអាមេរិក

មន្រ្តីសុខាភិបាលរដ្ឋបានប្រកាសនៅថ្ងៃអង្គារទី២៦ខែមករានេះថា វីរុសកូរ៉ូណាបម្លែងខ្លួនប្រភេទថ្មីរបស់ប្រេស៊ីលបានបង្ហាញវត្តមានជាលើកដំបូងនៅសហរដ្ឋអាមេរិក ក្នុងខ្លួនមនុស្សម្នាក់ដែលបានវិលត្រឡប់មករដ្ឋ Minnesota នាពេលថ្មីៗនេះក្រោយចាកចេញពីប្រទេសប្រេស៊ីល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ទីរសុខាភិបាលរដ្ឋ Minnesota បាននិយាយនៅក្នុងសេចក្តីថ្លែងការណ៍មួយថា វីរុសដែលគេស្គាល់ថា Brazil P1 ត្រូវបានរកឃើញនៅក្នុងសំណាកពីអ្នកជំងឺម្នាក់ដែលរស់នៅក្នុងតំបន់ Minneapolis-St Paul ហើយបានធ្លាក់ខ្លួនឈឺនៅសប្តាហ៍ដំបូងនៃខែមករា។

អ្នកជំនាញផ្នែករោគរាតត្បាតបានសម្ភាសន៍អ្នកជំងឺម្នាក់នោះជាថ្មីម្តងទៀត ដើម្បីទទួលបានព័ត៌មានលម្អិតបន្ថែមអំពីជំងឺ ការធ្វើដំណើរនិងទំនាក់ទំនងរបស់គេ។

ទោះបីជាយ៉ាងណាក៏ដោយ មិនមានការចង្អុលបង្ហាញភ្លាមៗថា វីរុសនេះកំពុងរីករាលដាលនៅក្នុងរដ្ឋនេះទេ។

វីរុសរបស់ប្រេស៊ីល ត្រូវបានកំណត់អត្តសញ្ញាណជាលើកដំបូងនៅក្នុងអ្នកដំណើរបួននាក់ដែលត្រូវបានធ្វើតេស្តនៅអាកាសយានដ្ឋានមួយ ខាងក្រៅទីក្រុងតូក្យូប្រទេសជប៉ុន។

យោងតាមមជ្ឈមណ្ឌលគ្រប់គ្រងនិងបង្ការជំងឺសហរដ្ឋអាមេរិកបានបង្ហាញថា វាមានសំណុំនៃការផ្លាស់ប្តូរហ្សែនដែលធ្វើឲ្យអង់ទីគ័រមិនអាចស្គាល់វាបាន។

អ្នកស្រាវជ្រាវខ្លះបានលើកឡើងពីការព្រួយបារម្ភថា វីរុសរបស់ប្រេស៊ីលអាចមានលទ្ធភាពចម្លងជំងឺដល់មនុស្សដែលធ្លាក់ខ្លួនឈឺដោយសារជំងឺកូវីដ១៩រួចទៅហើយ៕

ប្រែសម្រួលដោយ៖ Vann Vann

ប្រភព៖ CNA

ចុចអាន៖ វ៉ាក់សាំងរបស់ក្រុមហ៊ុន Moderna មានប្រសិទ្ធភាពប្រឆាំងវីរុសបម្លែងខ្លួនប្រភេទថ្មី