ចារកម្មអាមេរិក ៖ មេក្រុម Wagner ត្រូវលាក់ខ្លួនក្នុងបន្ទប់គ្មានបង្អួច ព្រោះខ្លាចគេធ្វើឃាត

ប្រមុខចារកម្មអាមេរិកអះអាងថា មេទាហានស៊ីឈ្នួល Wagner លោក Yevgeny Prigozhin ត្រូវលាក់ខ្លួនក្នុងបន្ទប់សណ្ឋាគារគ្មានបង្អួច នៅទីក្រុង Minsk ដើម្បីចៀសវាងការធ្វើឃាត បន្ទាប់ពីលោកបានដឹកនាំការបះបោរប្រដាប់អាវុធ ប្រឆាំងនឹងក្រសួងការពារជាតិរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារព័ត៌មានរដ្ឋបេឡារុស Belta បានចុះផ្សាយថា លោក Prigozhin បានមកដល់ប្រទេសបេឡារុស កាលពីថ្ងៃអង្គារទី២៦ខែមិថុនា ដើម្បីចាប់ផ្តើមជីវិតនិរទេសខ្លួនក្រោមកិច្ចព្រមព្រៀងដែលបញ្ចប់ការបះបោររយៈពេលខ្លី។

នៅពេលសួរអំពីបញ្ហារបស់លោក Prigozhin, ប្រធានគណៈកម្មាធិការស៊ើបការណ៍សម្ងាត់ព្រឹទ្ធសភាអាមេរិកលោក Mark Walker និយាយថា លោកបានទទួលរបាយការណ៍ដែលថា ប្រធានក្រុម Wagner កំពុងធ្វើគ្រប់វិធីដើម្បីចៀសវាងរឿងរ៉ាវអាក្រក់ដែលអាចកើតឡើងចំពោះខ្លួន។ ក្នុងរយៈពេលមួយឆ្នាំកន្លះមកនេះ មានជនជាតិរុស្ស៊ីមួយចំនួន ដែលក្រោយពេលប្រឆាំងលោក ពូទីន បានធ្លាក់ចេញពីបង្អួចជាន់ទី៥ ទី៦ ឬជាន់ទី៧យ៉ាងអាថ៌កំបាំង”។

ការអះអាងនេះកើតឡើង បន្ទាប់ពីទិន្នន័យរបស់គេហទំព័រ Flightradar បង្ហាញថា យន្តហោះរបស់លោក Prigozhin បានចាកចេញពីរដ្ឋធានីបេឡារុសវិញហើយ ដោយគេសន្និដ្ឋានថា គាត់អាចទៅពិភាក្សាទល់មុខគ្នាផ្ទាល់ជាមួយលោក ពូទីន។

យន្តហោះពាណិជ្ជកម្ម Embraer Legacy 600 ដែលមានលេខកន្ទុយ RA-02795 បានចាកចេញពីមូលដ្ឋានទ័ពអាកាស Machulishchy ក្បែរទីក្រុង Minsk ហើយក្រោយមក យន្តហោះបានចុះចតនៅរដ្ឋធានីរុស្ស៊ី៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ រុស្ស៊ី រ៉ាប់រងចិញ្ចឹមក្រុមហ៊ុនទាហានស៊ីឈ្នួល Wagner, មួយឆ្នាំៗ ផ្តល់ប្រាក់រាប់ពាន់លានដុល្លារ