អាមេរិកពិចារណាផ្តល់គ្រាប់បែកចង្កោមដល់អ៊ុយក្រែន

ប្រធានអគ្គសេនាធិការចម្រុះលោកឧត្តមសេនីយ៍ Mark Milley បាននិយាយកាលពីថ្ងៃសុក្រថា សហរដ្ឋអាមេរិកកំពុងពិចារណាពីលទ្ធភាពនៃការផ្គត់ផ្គង់គ្រាប់បែកចង្កោមដល់អ៊ុយក្រែន។

និយាយនៅក្នុងក្លឹបសារព័ត៌មានជាតិ លោក Milley ប្រាប់ថា ប្រជាជនអ៊ុយក្រែនបានស្នើសុំគ្រាប់បែកចង្កោម ខណៈប្រទេសអឺរ៉ុបផ្សេងទៀតបានផ្តល់មួយចំនួន ប៉ុន្តែត្រូវបានរុស្ស៊ីយកទៅប្រើប្រាស់ ចំណែកការសម្រេចចិត្តររបស់អាមេរិកវិញកំពុងតែ​ដំណើរការ តែនៅមិនទាន់មានការសម្រេចណាមួយឡើយ។

ទន្ទឹមនឹងនេះ ចំពោះការគាំទ្រផ្តល់កាំជ្រួច ATACMS និង F-16 ដល់អ៊ុយក្រែន ត្រូវបានពិនិត្យឡើងវិញជានិច្ចតាមតម្រូវការ បើតាមការបញ្ជាក់របស់លោក Milley។

ដោយឡែក ពាក់ព័ន្ធជាមួយបញ្ហាបះបោររបស់ក្រុមទាហ៊ានស៊ីឈ្នួល Wagner ប្រឆាំងរុស្ស៊ី លោក Milley យល់ថា​ វាហាក់បីដូចជាលឿនពេកក្នុងការសន្និដ្ឋានថា អាចធ្វើឱ្យលោកពូទីន ចុះខ្សោយ។

លោកបន្តថា ការវិវឌ្ឍន៍នៃបញ្ហាបះបោរនេះ ហាក់បីដូចជាបង្ហាញថា ការគាំទ្រចំពោះបញ្ហាសង្គ្រាមនៅក្នុងប្រទេសរុស្ស៊ីបានថយចុះ ប៉ុន្តែនៅមិនអាចដឹងច្បាស់នៅឡើយទេ។

គួរបញ្ជាក់ថា ក្រុមយោធាឯកជន Wagner ថ្មីៗនេះបានចូលរួមនៅក្នុងការបះបោរប្រដាប់អាវុធនៅក្នុងប្រទេសរុស្ស៊ី ខណៈពូទីន បានបញ្ជាក់ថា វាជាទង្វើក្បត់ជាតិ៕

ប្រែសម្រួល៖ នាង រតនៈ

ប្រភព៖​ Anadolu

ចុចអាន៖ ភាគហ៊ុនកើនឡើង រុញឱ្យទីផ្សារក្រុមហ៊ុន Apple កើនតម្លៃដល់ ៣ពាន់ពាន់លានដុល្លារ