អ្នកជំនាញ ៖ គ្រប់គ្នានៅតែអាចទៅមើលខ្មោចកប៉ាល់ទីតានិកដដែល

អ្នកជំនាញខាងកប៉ាល់ទីតានិកជនជាតិអាមេរិកម្នាក់ជឿជាក់ថា ភ្ញៀវទេសចរនៅតែអាចបន្តការទស្សនាខ្មោចកប៉ាល់នេះបាន ទោះបីជាមានហេតុការណ៍ផ្ទុះយានជ្រមុជទឹក Titan កាលពីខែមិថុនាក៏ដោយ ។

អ្នកស្រី Jessica Sanders ប្រធានក្រុមហ៊ុន Royal Mail Ship Titanic មានប្រសាសន៍ឥតស្ទាក់ស្ទើរថា “គ្រប់គ្នាគួរតែអាចបន្តទៅមើលខ្មោចកប៉ាល់ទីតានិកបានដដែល មិនមែនមានតែសេដ្ឋី យោធា ឬអ្នកផលិតភាពយន្តទេដែលអាចចុះទៅក្រោមសមុទ្រនោះ ព្រោះវាមិនប៉ះពាល់អ្វីឡើយ ដោយសារតែសោកនាដកម្មថ្មីៗនេះបានបញ្ចប់ទៅហើយ” ។

ទន្ទឹមនោះ អ្នកស្រី Jessica ត្រូវបានគេស្គាល់ថាជាមិត្តរួមការងារនឹងលោក Paul Henri Nargeolet អ្នករុករកជនជាតិបារាំងវ័យ ៧៧ ឆ្នាំ ជាជនរងគ្រោះម្នាក់ក្នុងចំណោម ៥ នាក់ដែលរួមមាន មហាសេដ្ឋីអង់គ្លេស Hamish Harding នាយកប្រតិបត្តិក្រុមហ៊ុន OceanGate លោក Stockton Rush មហាសេដ្ឋីប៉ាគីស្ថាន Shahzada Dawood និងកូនប្រុសវ័យ ១៩ ឆ្នាំឈ្មោះ Suleman Dawood ។

គួរបញ្ជាក់ជាថ្មីថា យានជ្រមុជទឹក Titan បានផ្ទុះក្រោមបាតសមុទ្រ អំឡុងពេលចុះទៅមើលខ្មោចកប៉ាល់ទីតានិក ហើយឆ្មាំឆ្នេរសមុទ្រអាមេរិកប្រកាសរកឃើញបំណែកនៃកម្ទេចកម្ទីរបស់យាន និងបំណែកសាកសពកាលពីថ្ងៃពុធ ទី២៨ ខែមិថុនា ៕

ប្រែសម្រួល៖ វារី

ប្រភព៖ Dailymail

ចុចអាន៖ អ្នកជំនាញសន្និដ្ឋានថា សពអ្នកស្លាប់ក្នុងយាន Titan អាចត្រូវត្រីឆ្លាមស៊ី គ្មានថ្ងៃរកឃើញឡើយ