អ៊ុយក្រែន ចង់បានយន្តហោះចម្បាំងច្រើនប្រភេទពីលោកខាងលិច មិនមែនត្រឹម F-16 ទេ

អ្នកនាំពាក្យបញ្ជាការកងទ័ពអាកាសអ៊ុយក្រែន លោក Yury Ignat បាននិយាយកាលពីថ្ងៃអង្គារ ទី៤ ខែកក្កដាថា យន្តហោះចម្បាំង F-16 ដែលបណ្តាប្រទេសលោកខាងលិចសន្យាផ្តល់ឲ្យអ៊ុយក្រែននោះ មិនមែនជាយន្តហោះយោធាតែមួយប្រភេទ ដែលរដ្ឋាភិបាលទីក្រុងកៀវចង់បាននោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅពេលសួរអំពីលទ្ធភាពរបស់ទីក្រុងកៀវ ក្នុងការទទួលបានយន្តហោះចម្បាំងផលិតដោយអាមេរិក F/A-18 Hornets ពីប្រទេសអូស្រ្តាលី, លោក Ignat បានប្រាប់អ្នកសារព័ត៌មានជាតិថា “អ៊ុយក្រែនកំពុងពិចារណា លើប្រភេទយន្តហោះផ្សេងទៀត ដែលអាចបង្កើនសមត្ថភាពប្រយុទ្ធ”។

ទោះបីជាយ៉ាងណាក៏ដោយ លោកទទួលស្គាល់ថា អ៊ុយក្រែនមិនអាចដាក់សម្ពាធលើសហរដ្ឋអាមេរិក និងសម្ព័ន្ធមិត្តខ្លាំងពេកទេ ដោយសារតែខ្លួនពឹងផ្អែកលើជំនួយរបស់លោកខាងលិច។

លោក Ignat និយាយថា យន្តហោះ F/A-18 និង F-15 ដែលផលិតដោយសហរដ្ឋអាមេរិក ក៏ដូចជា យន្តហោះព្យុះទីហ្វុង Eurofighter គឺហោះបានឆ្ងាយ និងអាចផ្ទុកអាវុធបានច្រើនជាង។ យ៉ាងណា លោកបញ្ជាក់ថា ទីក្រុងកៀវ នឹងនៅតែផ្តោតលើការទទួលបានយន្តហោះ F-16 ជាមុនសិន។

រឿងនេះកើតឡើង បន្ទាប់ពីប្រធានាធិបតីអ៊ុយក្រែនលោក Volodymyr Zelensky បានលើកឡើងកាលពីសប្តាហ៍មុនថា ប្រតិបត្តិការវាយបកដណ្ដើមយកទឹកដីរបស់រុស្ស៊ីខ្លះមកវិញពីសំណាក់កងម្លាំងទីក្រុងកៀវ ត្រូវទទួលរងបរាជ័យ ដោយសារតែប្រទេសលោកខាងលិច។

លោក Zelensky អះអាងថា “ប្រតិបត្តិការវាយបករបស់អ៊ុយក្រែនដែលបានធ្វើឡើងកាលពីដើមខែមិថុនា ត្រូវបានបំផ្លាញគ្មានសល់ ព្រោះតែកាំភ្លើងធំដែលផ្គត់ផ្គង់ដោយលោកខាងលិច មកដល់ទឹកដីអ៊ុយក្រែនយឺតពេក” ។

លោក Zelensky បានឲ្យដឹងទៀតថា “យើង​បញ្ឈប់ប្រតិបត្តិការវាយបកទៅលើរុស្ស៊ី ​យើងគ្មានសមត្ថភាពទៅមុខទៀតទេ ដោយសារតែយើងមិនមានកាំភ្លើងធំដើម្បីបាញ់តតាំងជាមួយសត្រូវ”៕

ប្រែសម្រួល៖ Vann Vann

ប្រភព៖ RT

ចុចអាន៖ មកស្គាល់ យន្តហោះចម្បាំង F-16 ដ៏មានឥទ្ធិពលរបស់ អាមេរិក ដែល អ៊ុយក្រែន កំពុងទទូចចង់បាន