អ្នកលេងបណ្ដាញសង្គម បារាំង យករូបភាពបាតុកម្មក្នុងខ្សែភាពយន្តបង្ហោះ​បង្កភាពវឹកវរតាមអ៊ីនធឺណិត

អាជ្ញាធរបារាំងបានចេញមកព្រមានដល់អ្នកប្រើប្រាស់ប្រព័ន្ធផ្សព្វផ្សាយសង្គម ជុំវិញការបង្ហោះព័ត៌មាន ក៏ដូចជារូបភាពក្លែងក្លាយអំពីកុបកម្មដែលកំពុងផ្ទុះឡើងនៅក្នុងប្រទេស បន្ទាប់ពីប៉ូលិសបានបាញ់សម្លាប់យុវជនអាយុ ១៧ ឆ្នាំម្នាក់ ដោយសារតែមិនគោរពច្បាប់ចរាចរណ៍នៅជាយក្រុងប៉ារីស ។

អ្នកប្រើប្រាស់បណ្ដាញសង្គមបានបង្ហោះរូបភាពមួយសន្លឹកដែលបង្ហាញពីយុវជនមួយក្រុមកំពុងបើកឡានប៉ូលិស ក្នុងអំឡុងពេលភាពមានចលាចលក្នុងប្រទេស ហើយរូបភាពនោះកំពុងរីករាលដាលខ្លាំងមែនទែននៅលើបណ្ដាញសង្គម ។

ប៉ុន្តែទាំងរូបរាង និងពណ៌របស់រថយន្ត ក៏ដូចជាចំនួនមនុស្សដែលជិះនៅលើរថយន្ត និងផ្ទៃខាងក្រោយក្នុងរូបភាពនោះ មើលទៅដូចគ្នាទៅនឹងឈុតឆាកក្នុងខ្សែភាពយន្តបារាំងមួយដែលមានចំណងជើងថា Athena ខណៈខ្សែភាពយន្តដែលចាក់បញ្ចាំងកាលពីឆ្នាំ ២០២២ មួយនេះគឺជារឿងប្រឌិតនៃការតវ៉ាដោយហិង្សាដែលបង្កឡើងដោយការស្លាប់របស់ក្មេងប្រុសម្នាក់ ។

ទន្ទឹមនោះ បើទោះបីជាការបង្ហោះពីដំបូងត្រូវបានលុបចោលវិញក៏ដោយ ប៉ុន្តែរូបភាពបង្កភាពវឹកវរនេះត្រូវបានចែករំលែកយ៉ាងគគ្រឹកគគ្រែងរួចទៅហើយ ស្របពេលដែលរូបភាពក្លែងក្លាយផ្សេងទៀតក៏កំពុងរីករាលដាលយ៉ាងខ្លាំងផងដែរ ដែលជំរុញឲ្យអាជ្ញាធរចេញការព្រមានដល់ប្រព័ន្ធផ្សព្វផ្សាយ និងអ្នកដទៃទៀតដែលចែករំលែករូបភាពក្លែងក្លាយនេះ ។

យោងតាមក្រសួង​មហាផ្ទៃ​បារាំងបានឲ្យដឹងថា ក្រុមកុបករបានដុតបំផ្លាញទ្រព្យសម្បត្តិសាធារណៈ និងរថយន្តជាង ៥,៨០០ គ្រឿង ខណៈចំនួនអគារដែលក្លាយជាគោលដៅនៃការដុតបំផ្លាញ ឬបំផ្លិចបំផ្លាញមានលើសពី ១,១០០ ខ្នងឯណោះ ។

ពាក់ព័ន្ធនឹងបញ្ហានេះដែរ លោកប្រធានាធិបតី Emmanuel Macron បានបើកកិច្ចប្រជុំមួយកាលពីថ្ងៃអង្គារជាមួយមេដឹកនាំនៃរដ្ឋាភិបាលក្នុងតំបន់ដែលផ្ទុះកុបកម្មជាង ២០០ នាក់ ដោយក្នុងនោះលោក Macron បាននិយាយថា រដ្ឋាភិបាលនឹងធ្វើសេចក្តីព្រាងច្បាប់បន្ទាន់ ដើម្បីជួសជុលសាលារៀន និងអគារសាធារណៈដែលរងការខូចខាត និងផ្តល់ជំនួយហិរញ្ញវត្ថុដល់អាជ្ញាធរមូលដ្ឋាន ប៉ុន្តែ​លោកក៏ទទួលស្គាល់ដែរថា ស្ថានការណ៍បច្ចុប្បន្ន​ទំនង​ជា​មិន​វិល​ទៅ​រក​ភាព​ប្រក្រតី​វិញ ​នៅ​ពេល​ណា​មួយ​ក្នុង​ពេល​ឆាប់​ៗ​នេះនោះ​ទេ ដោយសារតែ​អំពើ​ហិង្សានៅតែកើតមានបែបនេះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ បារាំង បដិសេធ រឿងបិទបណ្តាញសង្គម ដើម្បីគ្រប់គ្រងកុបកម្ម