ក្រុមតាលីបង់ ហាមមិនឲ្យស្រ្តី បើកហាងសាឡន

ក្រុមតាលីបង់ បានចេញសេចក្តីជូនដំណឹងអំពីការបិទហាងសាឡន នៅទូទាំងប្រទេសអាហ្វហ្គានីស្ថានរយៈពេលមួយខែ ស្របពេលក្រុមឥស្លាមនិយម បាននិងកំពុងរឹតបន្តឹងការក្តោបក្តាប់អំណាចរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យក្រសួងការពារជាតិនិងផ្សព្វផ្សាយគុណធម៌ លោក Mohammad Sadiq Akif បានប្រាប់រ៉យទ័រកាលពីថ្ងៃអង្គារ ទី៤ ខែកក្កដាថា “បម្រាមបើកហាងសាឡនសម្រាប់ស្រ្តីគឺមានរយៈពេលមួយខែ ហើយបម្រាមនេះ គឺចេញដោយមេដឹកនាំកំពូលលោក Mullah Hibatullah Akhundzada ប៉ុន្តែអាជ្ញាធរមិនបានពន្យល់ពីហេតុផលពិតប្រាកដនោះទេ” ។

ទោះបីជាយ៉ាងណាក៏ដោយ បេសកកម្មជំនួយរបស់អង្គការសហប្រជាជាតិ ប្រចាំនៅប្រទេសអាហ្វហ្គានីស្ថាន (UNAMA) បានជំរុញឲ្យអាជ្ញាធរលុបចោលបម្រាមនេះវិញ ដោយនិយាយថា ការរឹតបន្តឹងថ្មីលើសិទ្ធិស្ត្រី នឹងជះឥទ្ធិពលអវិជ្ជមានដល់សេដ្ឋកិច្ច។

គួរបញ្ជាក់ជាថ្មី ចាប់តាំងពីការដណ្តើមកាន់កាប់ប្រទេសអាហ្វហ្គានីស្ថាន ក្រោយពេលអាមេរិកដកទ័ពយ៉ាងវឹកវរក្នុងខែសីហាឆ្នាំ២០២១ ក្រុមតាលីបង់បានដាក់ការរឹតបន្តឹងដ៏ចម្រូងចម្រាសជាច្រើន ដោយហាមក្មេងស្រីមិនឲ្យចូលរៀនលើសថ្នាក់ទីប្រាំមួយ និងហាមស្ត្រីមិនឲ្យទៅធ្វើការនិងទីតាំងសាធារណៈជាច្រើន។

ទន្ទឹមនោះ ស្ត្រីត្រូវតម្រូវឲ្យបិទមុខរបស់ពួកគេនៅទីសាធារណៈ និងកុំចេញពីផ្ទះ លើកលែងតែក្នុងករណីចាំបាច់ប៉ុណ្ណោះ ខណៈពួកគេក៏តម្រូវឲ្យមានសាច់ញាតិធ្វើដំណើរទៅជាមួយផងដែរ បើសិនជាទៅឆ្ងាយ៕

ប្រែសម្រួល៖ Vann Vann

ប្រភព៖ RT

ចុចអាន៖ តាលីបង់ បញ្ជាឲ្យប៉ុស្តិ៍ទូរទស្សន៍បញ្ឈប់ការចាក់ផ្សាយរឿងណាដែលមាន តួស្រី