រុស្ស៊ី៖ ជម្លោះអាចចប់ត្រឹមប៉ុន្មានថ្ងៃប៉ុណ្ណោះ បើអាមេរិក ឈប់ផ្តល់អាវុធឲ្យ អ៊ុយក្រែន

អតីតប្រធានាធិបតីរុស្ស៊ី លោក Dmitry Medvedev បានប្រាប់សារព័ត៌មាន TASS កាលពីថ្ងៃពុធ ទី៥ ខែកក្កដាថា ជម្លោះរវាងទីក្រុងមូស្គូ និងទីក្រុងកៀវ ដែលកំពុងបន្តអូសបន្លាយពេលយូរបែបនេះ គឺដោយសារតែប្រទេសលោកខាងលិច មិនព្រមបញ្ឈប់ការបញ្ជូនអាវុធទៅឲ្យអ៊ុយក្រែន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Medvedev បាន​ប្រាប់​ទីភ្នាក់ងារ​ព័ត៌មាននេះ​ថា “​ប្រសិនបើ​អង្គការ​ណាតូ ពិសេស​អាមេរិក និង​ទាសករ​របស់​ខ្លួន ​បញ្ឈប់​ការ​ផ្គត់ផ្គង់​សព្វាវុធ​ដល់​អ៊ុយក្រែននោះ ប្រតិបត្តិការ​យោធា​ពិសេសរបស់រុស្ស៊ី នឹង​ត្រូវ​បញ្ចប់​ក្នុង​រយៈពេលត្រឹម​តែ​ប៉ុន្មាន​ខែ​ប៉ុណ្ណោះ ហើយវាក៏អាចបញ្ចប់ ក្នុងរយៈពេលប៉ុន្មានថ្ងៃផងដែរ ប្រសិនបើទីក្រុងវ៉ាស៊ីនតោន និងសម្ព័ន្ធមិត្ត បញ្ឈប់ការដឹកជញ្ជូន”។

លោក Medvedev បន្តថា សង្គ្រាមណាក៏ដោយ ធំក្តីតូចក្តី វាអាចបញ្ចប់យ៉ាងលឿន ប្រសិនបើសន្ធិសញ្ញាសន្តិភាពត្រូវបានចុះហត្ថលេខា ឬប្រសិនបើនរណាម្នាក់ ធ្វើដូចអាមេរិកកាលពីឆ្នាំ ១៩៤៥ ដោយប្រើអាវុធនុយក្លេអ៊ែរ និងការទម្លាក់គ្រាប់បែកលើទីក្រុងរបស់ប្រទេសជប៉ុន ។

គួររំឭកឡើងវិញថា ការទម្លាក់គ្រាប់បែកនុយក្លេអ៊ែររបស់អាមេរិក ទៅលើទីក្រុងហ៊ីរ៉ូស៊ីម៉ា និងណាហ្គាសាគី បានឆក់យកជីវិតមនុស្សរហូតដល់ ៨ ម៉ឺននាក់ ហើយផលវិបាករយៈពេលវែងនៃការវាយប្រហារនោះ ដែលរួមមានទាំង ការបំពុលដោយជាតិវិទ្យុសកម្មផងដែរ អាចនាំឲ្យចំនួនជនរងគ្រោះឈានទៅដល់ ១៦៦,០០០ នាក់នៅទីក្រុងហ៊ីរ៉ូស៊ីម៉ា និង ១៤,០០០០ នាក់ នៅណាហ្គាសាគី ។

លើសពីនេះ លោក Medvedev ដែលបច្ចុប្បន្នមានតួនាទីជាអនុប្រធានក្រុមប្រឹក្សាសន្តិសុខរុស្ស៊ី ក៏បានប្រឆាំងនឹងការដាក់ពង្រាយអាវុធនុយក្លេអ៊ែររបស់សហរដ្ឋអាមេរិក ទៅកាន់ប្រទេសប៉ូឡូញផងដែរ ដោយព្រមានថា វាអាចបង្កឲ្យមានជម្លោះនុយក្លេអ៊ែរ៕

ប្រែសម្រួល៖ Vann Vann

ប្រភព៖ RT

ចុចអាន៖ រុស្ស៊ី ប្រាប់ពីលក្ខខណ្ឌដែលនឹងផ្ទុះសង្គ្រាមនុយក្លេអ៊ែរ