WHO ព្រមានថា ប៉ុន្មានខែខាងមុខ ទឹកជំនន់ ព្យុះសង្ឃរា រលកកម្តៅកាន់តែសាហាវ នឹងវាយប្រហារពិភពលោក

ប្រធានអង្គការសុខភាពពិភពលោក (WHO) លោក Tedros Adhanom Ghebreyesus បាននិយាយក្នុងសន្និសីទសារព័ត៌មានមួយ កាលពីថ្ងៃពុធ ទី៥ ខែកក្កដាថា ក្នុងរយៈពេលប៉ុន្មានខែខាងមុខនេះ ពិភពលោកអាចនឹងរងការវាយប្រហារដោយព្រឹត្តិការណ៍អាកាសធាតុកាចសាហាវ ដូចជាទឹកជំនន់ ព្យុះសង្ឃរា និងរលកកម្តៅជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានោះ លោកក៏បាននិយាយផងដែរថា WHO កំពុងត្រៀមខ្លួនទប់ទល់នឹង ការរីករាលដាលកាន់តែខ្លាំងនៃជំងឺនានាដូចជា គ្រុនឈាម Zika និង Chikungunya ដោយសារតែទំនាក់ទំនងទៅនឹងបាតុភូតអាកាសធាតុ El Niño។

El Niño ដែលជាការកើនឡើងនៃសីតុណ្ហភាពផ្ទៃទឹកនៅមហាសមុទ្រប៉ាស៊ីហ្វិកភាគខាងកើត និងកណ្តាល តែងតែវិលត្រលប់មកវិញ បន្ទាប់ពីគំរូអាកាសធាតុ La Nina រយៈពេលបីឆ្នាំ។

ដោយសារតែកត្តាទាំងនេះហើយ វាទំនងជានឹងផ្តល់ផលអាក្រក់ដល់អាកាសធាតុនៅចុងឆ្នាំ២០២៣ ដែលផលអាក្រក់ទាំងនោះមានដូចជាព្យុះត្រូពិក ដែលបោះពួយទៅកាន់កោះប៉ាស៊ីហ្វិកដែលងាយរងគ្រោះ, ភ្លៀងធ្លាក់ខ្លាំងនៅតំបន់អាមេរិកខាងត្បូង និងគ្រោះរាំងស្ងួតក្នុងប្រទេសអូស្ត្រាលី និងនៅតំបន់ខ្លះនៃទ្វីបអាស៊ី។

ទន្ទឹមនោះ ប្រធាន WHO ក៏បានព្រមានផងដែរថា បម្រែបម្រួលអាកាសធាតុ កំពុងជំរុញការបង្កាត់ពូជរបស់មូស ហើយអត្រានៃជំងឺគ្រុនឈាម បានកើនឡើងយ៉ាងខ្លាំងក្នុងរយៈពេលប៉ុន្មានទសវត្សរ៍ថ្មីៗនេះ ជាពិសេសនៅអាមេរិកតែម្តង៕

ប្រែសម្រួល៖ Vann Vann

ប្រភព៖ RT, Weather Network

ចុចអាន៖ ថ្ងៃក្តៅបំផុតក្នុងប្រវត្តិសាស្រ្តពិភពលោក បានមកដល់