វៀតណាម ផ្តល់ព័ត៌មានបន្ថែម អំពីករណីវាយប្រហារប្រដាប់អាវុធ នៅខេត្ត ជាប់កម្ពុជា

ប្រទេសវៀតណាមបាននិយាយថា ការវាយប្រហារដ៏សាហាវកាលពីខែមុន ទៅលើការិយាល័យគណៈកម្មាធិការប្រជាជនចំនួនពីរ ក្នុងខេត្ត Dak Lak ដែលបណ្តាលឲ្យមនុស្ស៩នាក់ស្លាប់ គឺមិនមានជាប់ពាក់ព័ន្ធកត្តាពូជសាសន៍នោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យក្រសួងការបរទេស លោកស្រី Pham Thu Hang បាននិយាយក្នុងសន្និសីទសារព័ត៌មានកាលពីថ្ងៃព្រហស្បតិ៍ទី៦ខែកក្កដាថា “យើងសូមបដិសេធទាំងស្រុងនូវការគិតខុសទាំងនេះ”។

​ឆ្លើយ​តបទៅ​នឹង​ការ​ចោទ​សួរ​របស់​អ្នក​សារព័ត៌មាន ​ថា​តើ​ទំនាក់ទំនង​ពូជសាសន៍​ដែល​មាន​ភាព​តានតឹងស្រាប់ទៅហើយនោះ ​មានជាប់ពាក់ព័ន្ធក្នុង​ឧបទ្ទវហេតុ​នេះ​ឬក៏​អត់ លោកស្រីឆ្លើយ​ថា “​នេះ​គឺជា​សកម្មភាព​បំពាន​ច្បាប់ ​ដែលបង្ក​អស្ថិរភាព​សន្តិសុខ​និង​សណ្ដាប់ធ្នាប់​យ៉ាង​ធ្ងន់ធ្ងរ ជាពិសេសរឿងនេះ​នឹង​ត្រូវ​ដោះស្រាយ​តាម​ច្បាប់​ ហើយក៏គ្មានអ្វីជាប់ពាក់ព័ន្ធកត្តាពូជសាសន៍នោះដែរ”។

កាលពីខែមុន នាយកដ្ឋានសន្តិសុខមាតុភូមិវៀតណាមនិយាយថា ក្រុមប្រដាប់ទាំងនេះ គឺមានទំនាក់ទំនងជាមួយពួកភេរវករ ដែលមានមូលដ្ឋាននៅសហរដ្ឋអាមេរិក។

ឧត្តមសេនីយ៍ទោ Pham Ngoc Viet ប្រធាននាយកដ្ឋានសន្តិសុខមាតុភូមិនៃក្រសួងសន្តិសុខសាធារណៈ បាននិយាយកាលពីថ្ងៃពុធទី២១ខែមិថុនាថា ជនសង្ស័យម្នាក់ក្នុងចំណោមជនសង្ស័យ ដែលពាក់ព័ន្ធក្នុងការវាយប្រហារលើការិយាល័យគណៈកម្មាធិការប្រជាជនឃុំ Ea Tieu និង Ea Ktur គឺជាសមាជិកនៃអង្គការភេរវកម្ម ដែលមានមូលដ្ឋាននៅសហរដ្ឋអាមេរិក ហើយជននោះ ត្រូវបានគេណែនាំឲ្យចូលមកប្រទេសវៀតណាម និងរៀបចំផែនការវាយប្រហារ ខណៈរហូត​មក​ដល់​ពេល​នេះ ជន​សង្ស័យ ៩០ នាក់​ត្រូវ​បាន​ចាប់​ខ្លួន​ពី​បទ​ឧក្រិដ្ឋកម្ម​ជា​ច្រើន​រួម​ទាំង​អំពើ​ភេរវកម្មផងដែរ៕

ប្រែសម្រួល៖ Vann Vann

ប្រភព៖ VN Express

ចុចអាន៖ ក្រុមប្រដាប់អាវុធវៀតណាម វាយប្រហារក្នុងខេត្តជាប់កម្ពុជា គឺមានទំនាក់ទំនង ជាមួយពួកភេរវករ នៅអាមេរិក