ព័ត៌មានអន្ដរជាតិ

នៅថៃ ធរណីស្រូបកណ្ដាលបឹង ត្រីរាប់ម៉ឺនក្បាល បាត់គ្មានសល់

បានផុស

២ years មុន

នៅ

ថ្ងៃសុក្រ ៧ កក្កដា ២០២៣

ដោយ

ប្រទេសថៃ ៖ បឹងដ៏ធំមួយកន្លែង លាតសន្ធឹងលើផ្ទៃដីប្រមាណ ៥ រ៉ៃ ត្រូវព្រះធរណីស្រូបចំកណ្ដាលបឹង បង្កជារីងស្ងួតត្រឹមរយៈពេលប៉ុន្មានម៉ោង និងហ្វូងត្រីរាប់ម៉ឺនក្បាល បែរជាគ្មានសល់មួយក្បាលទាល់តែសោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍ដ៏រន្ធត់នេះ បានកើតឡើងកាលពីរសៀលថ្ងៃទី ៦ ខែកក្កដា ឆ្នាំ ២០២៣ ភូមិសាស្ត្រឃុំហាង៉ាម ស្រុកវៀងឆៃ ខេត្តឈៀងរ៉ាយ ប្រទេសថៃ ដែលបឹងដ៏ធំនេះ គឺជាបឹងរួមសម្រាប់ឲ្យប្រជាពលរដ្ឋរស់នៅក្នុងភូមិចំនួន ៣ ប្រើប្រាស់ មានទំហំប្រមាណ ៥ រ៉ៃ និងជម្រៅជិត ៥ ម៉ែត្រ ព្រមទាំងមានការដាក់ចិញ្ចឹមត្រីរាប់ម៉ឺនក្បាលផងដែរ។

ប្រជាពលរដ្ឋរស់នៅក្នុងតំបន់ខាងលើបានលើកឡើងថា កាលពី ៣ ថ្ងៃមុន ទឹកបឹង នៅពេញព្រៀប និងមានពណ៌ខៀវថ្លា។ ស្រាប់តែ ២ ថ្ងៃនេះ ទឹកចាប់ផ្ដើមស្រករហូតទាល់តែអស់ពីបាតបឹងតែម្ដង ព្រមទាំងលេចចេញនូវរណ្ដៅមួយយ៉ាងធំ ទំនងជាព្រះធរណីស្រូប ហើយត្រីរាប់ម៉ឺនក្បាលបាត់អស់គ្មានសល់ ធ្វើឲ្យប្រភពជាច្រើនមានការងឿងឆ្ងល់ថា តើត្រីជ្រៀតចូលទៅក្នុងដីដោយរបៀបណា? បានជាគ្មានសល់មួយក្បាលសោះអញ្ចឹង?

នៅពេលនោះដែរ អ្នកជឿទៅលើជំនឿ បានអុចធូប ទៀន ដើម្បីបែរបន់សុំខមាទោសពីម្ចាស់ទឹក ម្ចាស់ដី ក្រែងមានការខុសឆ្គងពាក្យសម្ដីអ្វីមួយ សុំឲ្យមានការលើកលែង កុំប្រកាន់។ តែសម្រាប់ប្រភពមួយចំនួនទៀត គេគិតតាមបែបវិទ្យាសាស្ត្រ ថា វាជាការស្រុតដី ឬ ធរណីស្រូបតែប៉ុណ្ណោះ៕

អត្ថបទ ៖ សោ និយមរ័ត្ន