លោក Lukashenko បញ្ជាក់ថា មេដឹកនាំក្រុមទាហានស៊ីឈ្នួល រុស្ស៊ី លែងនៅប្រទេសបេឡារុសហើយ

ប្រធានាធិបតីបេឡារុសលោក Alexander Lukashenko បាននិយាយថា មេដឹកនាំក្រុមទាហានស៊ីឈ្នួល Wagner Group លោក Yevgeny Prigozhin បានចាកចេញពីប្រទេសបេឡារុស ហើយត្រលប់ទៅប្រទេសរុស្ស៊ីវិញហើយ ។

ការិយាល័យប្រធានាធិបតីរបស់លោក Lukashenko បាននិយាយទៅកាន់អ្នកសារព័ត៌មានកាលពីថ្ងៃព្រហស្បតិ៍ថា លោក Prigozhin កំពុងស្ថិតនៅក្នុងទីក្រុង St. Petersburg ហើយប្រហែលជាបានទៅទីក្រុងមូស្គូ ឬកន្លែងផ្សេងទៀតក្នុងប្រទេសរុស្ស៊ី ប៉ុន្តែឥឡូវនេះលោកមិននៅក្នុងប្រទេសបេឡារុសទៀតនោះទេ ។

លោក Lukashenko បានបន្ថែមទៀតថា ចំណែកអ្នកប្រយុទ្ធរបស់ក្រុមទាហានស៊ីឈ្នួល Wagner Group កំពុងស្នាក់នៅក្នុងជំរំអចិន្ត្រៃយ៍របស់ពួកគេ ប៉ុន្តែលោកមិនបានប្រាប់ពីទីតាំងរបស់ពួកគេថានៅទីណានោះទេ ។

គួរបញ្ជាក់ថា ក្រុមទាហានស៊ីឈ្នួល Wagner Group ដែលដឹកនាំដោយលោក Prigozhin បានប៉ុនប៉ងបះបោរប្រដាប់អាវុធបរឆាំងនឹងទីក្រុងមូស្គូកាលពីថ្ងៃទី២៤ ខែមិថុនា ហើយបីថ្ងៃក្រោយមកលោក Lukashenko បានប្រកាសថា លោក Prigozhin ស្ថិតនៅក្នុងប្រទេសបេឡារុស ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ក្រុមទាហានស៊ីឈ្នួល រុស្ស៊ី ដែលភៀសខ្លួនទៅ បេឡារុស កំពុងសំងំ​ហ្វឹកហាត់ប្រើរថក្រោះ