ការធ្វើដំណើរតាមផ្លូវអាកាសសកលឡើងដល់ ៩៦ ភាគរយនៃកម្រិតមុនកូវីដ

យោងតាមសមាគមដឹកជញ្ជូនផ្លូវអាកាសអន្តរជាតិ (IATA) បានឲ្យដឹងកាលពីថ្ងៃព្រហស្បតិ៍ថា គិតត្រឹមខែឧសភា ចរាចរណ៍ផ្លូវអាកាសពិភពលោកបានឈានដល់ ៩៦.១ ភាគរយនៃកម្រិតមុនកូវីដ ដោយសារតម្រូវការធ្វើដំណើរ​មានកំណើនខ្ពស់ ។

ចរាចរណ៍ផ្លូវអាកាស បានកើនឡើង ៣៩.១ ភាគរយ បើប្រៀបធៀបនឹងខែឧសភាឆ្នាំមុន​ ចំណែកការដឹកទំនិញវិញកើនឡើងដល់ ៨១.៨ ភាគរយ ខណៈក្រុមហ៊ុនដឹកជញ្ជូនអាមេរិកខាងជើង មានកំណើនជាង ៨៦.៣ ភាគរយ ។

ពាក់ព័ន្ធនឹងបញ្ហានេះដែរលោក Willie Walsh អគ្គនាយក IATA បង្ហាញថា ការហោះហើររបស់យន្តហោះផ្ទុកទំនិញឈានដល់ ៨១.៨ ភាគរយ ​។ ដោយឡែក​ ចរាចរណ៍ផ្លូវអាកាសក្នុងប្រទេសកើនឡើង ៣៦.៤ ភាគរយ បើធៀបនឹងឆ្នាំមុន ដែលលើសពីកម្រិតមុនកូវីដ ៥.៣ ភាគរយ ។

លោក Walsh បានឲ្យដឹងទៀតថា ចំពោះចរាចរណ៍ផ្លូវអាកាសជាអន្តរជាតិវិញ បានកើនឡើងជាង ៤១ ភាគរយ ធៀបនឹងឆ្នាំមុន ខណៈការហោះហើរក្នុងរដូវក្ដៅឈានដល់ ៩០.៨ ភាគរយនៃកម្រិតឆ្នាំ ២០១៩ ។

ដោយឡែក សម្រាប់ទិន្នន័យផ្សេងទៀតរបស់ IATA បានបង្ហាញថា តម្រូវការសកលសម្រាប់ទំនិញដឹកតាមអាកាស ដែលវាស់វែងជាតោន ឬគីឡូម៉ែត្រ បានធ្លាក់ចុះ ៥.២ ភាគរយ បើធៀបនឹងខែឧសភា ឆ្នាំ ២០២២ ។ ចំណែកសមត្ថភាពហោះហើរផ្ទុកទំនិញ បានកើនឡើង ១៤.៥ ភាគរយ បើធៀបនឹងឆ្នាំមុន ៕

ប្រែសម្រួល៖ នាង រតនៈ

ប្រភព៖ Anadolu