អង្គការណាតូ ថា មិនជាប់ពាក់ព័ន្ធនឹងការផ្ដល់គ្រាប់បែកចង្កោមឲ្យ អ៊ុយក្រែន ឡើយ

អគ្គលេខាធិការអង្គការណាតូ Jens Stoltenberg បាននិយាយកាលពីថ្ងៃសុក្រថា អង្គការណាតូមិនមានគោលជំហររួម ឬជាប់ពាក់ព័ន្ធនឹងការសម្រេចចិត្តផ្ដល់គ្រាប់បែកចង្កោមទៅឲ្យអ៊ុយក្រែននោះទេ ។

លោក Stoltenberg បានប្រាប់អ្នកយកព័ត៌មាន មុនកិច្ចប្រជុំកំពូលនៅទីក្រុងវីនីញូសរបស់ប្រទេសលីទុយអានីថាអង្គការណាតូមិនមានគោលជំហរលើការផ្ដល់គ្រាប់បែកចង្កោមសម្រាប់អ៊ុយក្រែននោះទេ ហើយការសម្រេចចិត្តលើបញ្ហានេះ គឺធ្វើឡើងដោយរដ្ឋសមាជិកខ្លួនឯងប៉ុណ្ណោះ ។

លោក Stoltenberg បានលើកឡើងថា “អង្គការណាតូក្នុងនាមជាសម្ព័ន្ធមិត្ត មិនមានជំហរលើអនុសញ្ញាស្តីពីគ្រាប់បែកចង្កោមនោះទេ ដោយសារសម្ព័ន្ធមិត្តមួយចំនួនបានចុះហត្ថលេខាលើអនុសញ្ញានេះ ប៉ុន្តែសម្ព័ន្ធមិត្តមួយចំនួនទៀតក៏មិនបានចុះហត្ថលេខាលើអនុសញ្ញានេះផងដែរ ដូច្នេះវាអាស្រ័យលើសម្ព័ន្ធមិត្តនីមួយៗដើម្បីធ្វើការសម្រេចចិត្តដោយខ្លួនឯង” ។

ពាក់ព័ន្ធនឹងបញ្ហានេះដែរ ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិ លោក Vassily Nebenzia បាននិយាយថា ការផ្គត់ផ្គង់គ្រាប់បែកចង្កោមពីសំណាក់សហរដ្ឋអាមេរិកទៅឲ្យទីក្រុងកៀវ នឹងបង្កើន “ជំហានមួយទៀត” ក្នុងជម្លោះនៅអ៊ុយក្រែន ។

ស្របពេលជាមួយគ្នានេះ លោក បៃដិន ក៏បានលើកឡើងពីគោលបំណងដែលសហរដ្ឋអាមេរិកបានសម្រេចចិត្តផ្ដល់គ្រាប់បែកចង្កោមទៅឲ្យអ៊ុយក្រែនផងដែរ គឺដោយសារតែទាំងរដ្ឋាភិបាលទីក្រុងវ៉ាស៊ីនតោន និងទីក្រុងកៀវកំពុងអស់គ្រាប់ធម្មតាហើយ ដូច្នេះមានតែគ្រាប់បែកប្រភេទនេះប៉ុណ្ណោះដែលជាជម្រើសដ៏ល្អ ៕

ប្រែសម្រួលដោយ ៖ ជីវ័ន្ត

ប្រភព ​៖ Sputnik

ចុចអាន ៖ លោក បៃដិន ប្រាប់មូលហេតុដែល អាមេរិក សម្រេចបញ្ជូនគ្រាប់បែកចង្កោម​ទៅឲ្យ អ៊ុយក្រែន