«ទឹកតែ» នៅតែជាភេសជ្ជៈសម្រាប់ទទួលភ្ញៀវដ៏ពេញនិយមរបស់ពលរដ្ឋចិន

នៅក្នុងប្រទេសកម្ពុជា និងប្រទេសផ្សេងៗទៀតលើលោកនេះ ទឹកបរិសុទ្ធ ទឹកក្រូច និងភេសជ្ជៈមួយចំនួនទៀត គឺពេញនិយមខ្លាំងណាស់សម្រាប់ដាក់ទទួលភ្ញៀវដែលមកលេងផ្ទះ ឬសម្រាប់ទទួលទាននៅក្នុងអាហារដ្ឋាន និងភោជនីយដ្ឋានជាដើម។ ប៉ុន្តែ នៅក្នុងប្រទេសចិនវិញ ភេសជ្ជៈដែលគេនិយមដាក់ទទួលភ្ញៀវ ឬទទួលទានជាប្រចាំថ្ងៃនោះ គឺទឹកតែ។

តាមពិត បើនិយាយពីការបរិភោគទឹកតែជាប្រចាំថ្ងៃ គេនឹងនឹកឃើញភ្លាមដល់របៀបរបបនៃការរស់នៅរបស់ប្រជាជនចិននៅក្នុងសម័យបុរាណតាមរយៈការអានឯកសារប្រវត្តិសាស្ត្រ និងការទស្សនាខ្សែភាពយន្តបុរាណចិន។ ជនជាតិចិននាសម័យបុរាណ គឺយកទឹកតែផឹកជំនួសទឹកធម្មតានៅក្នុងជីវភាពប្រចាំថ្ងៃរបស់ពួកគេ។ រហូតមកដល់ពេលនេះ ឲ្យតែនិយាយរឿងទឹកតែ ឬតែ គឺគេតែងនឹកឃើញពីគុណភាពនៃតែរបស់ចិនដែលត្រូវបានកោតសរសើរថា មានគុណភាពល្អ និងរសជាតិឆ្ញាញ់។

នៅពេលបច្ចុប្បន្ននេះ ទឹកតែ​ នៅតែពេញនិយមដដែលសម្រាប់ប្រជាពលរដ្ឋចិន។ អ្នកកាសែតជាស្រ្តីនៃកាសែត គ័ងស៊ី ដេលី (Guangxi Daily)ម្នាក់ បានរៀបរាប់ថា នៅប្រទេសចិន មិនថានៅតំបន់ណា ខេត្តណា ទីក្រុង ឬទីជនបទណានោះទេ គឺទឹកតែនេះ ជាភេសជ្ជៈទទួលទានប្រចាំថ្ងៃរបស់ប្រជាពលរដ្ឋចិន។ គាត់ថា សូម្បីតែនៅក្នុងពិធីមង្គលការ ឬបុណ្យទានផ្សេងៗ ក៏គេមិនដែលចោលប៉ាន់តែ និងទឹកតែនោះឡើយ ពោល គឺជនជាតិចិនទទួលទានទឹកតែ ប្រៀបដូចជនជាតិដទៃទទួលទានទឹកធម្មតាយ៉ាងដូច្នោះដែរ។

ចំណែក នៅតាមអាហារដ្ឋាន ឬភោជនីយដ្ឋានវិញ មិនថា តូច ធំ ឬទំនើប កម្រិតណានោះទេ គឺតែងតែមានប៉ាន់តែ និងកែវតែ នៅលើតុជាប់ជានិច្ចសម្រាប់ទទួលទានជាមួយអាហារដ៏សម្បូរបែបនៅលើតុនោះ។ សម្រាប់ជាតិសាសន៍ដទៃ អាចថា ជារឿងប្លែកបន្តិច ប៉ុន្តែ សម្រាប់ជនជាតិចិន វា គឺជារឿងធម្មតា។ ភ្ញៀវដែលជាជនបរទេសទៅលេងកម្សាន្តប្រទេសចិន បើចង់បរិភោគទឹកសុទ្ធ ទាល់តែកុម៉្មុង់បន្ថែម ទើបគេយកមកជូន ព្រោះគេមិនទម្លាប់ដាក់ទឹកបរិសុទ្ធសម្រាប់ទទួលភ្ញៀវ ឬទទួលទានឡើយ៕