បារាំង ហាមមិនឲ្យលក់-ទិញកាំជ្រួចក្នុងទិវាចាប់ផ្ដើមបដិវត្តន៍ ដើម្បីការពារកុបកម្មផ្ទុះឡើងជាថ្មី

ប្រទេសបារាំងបានហាមឃាត់ការលក់-ទិញ ការកាន់កាប់ និងការដឹកជញ្ជូនកាំជ្រួចទាំងអស់ ក្នុងអំឡុងពេលទិវា Bastille Day នៅ​ថ្ងៃទី១៤ ខែកក្កដា ដែលជាទិវាតំណាងឲ្យការចាប់ផ្តើមនៃបដិវត្តន៍បារាំងជាង ២០០ ឆ្នាំមុន ។

យោងតាមសេចក្តីប្រកាសព័ត៌មានបានឲ្យដឹងថា ដើម្បីទប់ស្កាត់ហានិភ័យនៃការរំខានធ្ងន់ធ្ងរដលសណ្តាប់ធ្នាប់សាធារណៈ ក្នុងឱកាសនៃទិវា Bastille Day, អាជ្ញាធរបារាំងបានដាក់ចេញនូវការហាមឃាត់ការលក់ ការដឹកជញ្ជូន និងការប្រើប្រាស់វត្ថុធាតុដែលអាចដុតឆេះ ដូចជា រំសេវ និងកាំជ្រួច រហូតដល់ថ្ងៃទី១៥ ខែកក្កដា ប៉ុន្តែការហាមឃាត់មួយនេះ ត្រូវបានលើកលែងចំពោះការបង្ហាញការបាញ់កាំជ្រួចផ្លូវការដែលរៀបចំដោយអាជ្ញាធរមូលដ្ឋាន ។

ក្រៅ​ពីការរឹត​បន្តឹងលើកាំជ្រូច បារាំងក៏នឹងដាក់ពង្រាយបន្ថែមនូវកងកម្លាំងសន្តិសុខដ៏ច្រើនដើម្បីរក្សាសន្តិភាព និងដើម្បីការពារបារាំងកុំឲ្យមានបញ្ហារំខានកើតឡើងនៅក្នុងថ្ងៃពិសេស​មួយនេះផងដែរ បន្ទាប់ពីមានកុបកម្មកើតឡើងកាលពីពេលថ្មីៗនេះ ។

បញ្ហាកុបកម្មដ៏ចលាចលក្នុងប្រទេសមួយនេះ​កើតឡើង បន្ទាប់ពីប៉ូលិសបានបាញ់សម្លាប់យុវជនម្នាក់ឈ្មោះ Nahel អាយុ ១៧ ឆ្នាំ​នៅទីក្រុង Nanterre ដោយសារតែមិនគោរពច្បាប់ចរាចរណ៍ ខណៈតាមតួលេខ មនុស្ស​ជាង ៣,៧០០ នាក់ត្រូវបានចាប់ខ្លួន រួមទាំងក្មេងៗយ៉ាងហោចណាស់ ១,១៦០ នាក់ផងដែរ ៕

ប្រែសម្រួល៖ នាង រតនៈ

ប្រភព៖ BBC

ចុចអាន ៖ ក្រុមហ៊ុនអាកាសចរណ៍ ២ លើពិភពលោក មានគ្រោះថ្នាក់ច្រើនជាងគេបង្អស់