៣ខែទៀត អាល្លឺម៉ង់ ទៅបើករោងចក្រផលិតរថក្រោះ ដល់ អ៊ុយក្រែន

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុនផលិតអាវុធអាល្លឺម៉ង់ Rheinmetall នឹងបើករោងចក្រផលិតរថក្រោះ និងរថពាសដែកនៅប្រទេសអ៊ុយក្រែន ក្នុងរយៈពេល ១២ សប្តាហ៍ខាងមុខ ។ នេះបើតាមការបញ្ជាក់ពីនាយកប្រតិបត្តិលោក Armin Papperger ប្រាប់ទៅ CNN កាលពីថ្ងៃចន្ទ ទី១០ ខែកក្កដា ។

ក្រុមហ៊ុនអះអាងថា នឹងអាចផលិតរថក្រោះបាន ៤០០ គ្រឿងក្នុងមួយឆ្នាំ នៅឯរោងចក្រមួយនេះ ប៉ុន្តែរុស្ស៊ី បានគំរាមបាញ់មីស៊ីល​កម្ទេចរួចទៅហើយ បើរោងចក្រនេះបើកដំណើរការមែន ។

ទន្ទឹមនោះ រោងចក្រនេះ នឹងមានទីតាំងនៅភាគខាងលិចប្រទេសអ៊ុយក្រែន ហើយដំណើរការរួមគ្នាដោយក្រុមហ៊ុន Rheinmetall និងក្រុមហ៊ុនអាវុធរដ្ឋអ៊ុយក្រែន Ukroboronprom ។

ស្របពេលជាមួយគ្នានេះ លោក Papperger បាននិយាយទៀតថា “អ៊ុយក្រែន ត្រូវតែជួយខ្លួនឯង ប្រសិនបើពួកគេចាំតែអឺរ៉ុប ឬអាមេរិកជួយពួកគេក្នុងរយៈពេល ១០ ឬ ២០ ឆ្នាំខាងមុខនោះ វាមិនអាចទៅរួចទេ”។

ពាក់ព័ន្ធនឹងបញ្ហានេះដែរ ក្រុមហ៊ុន Rheinmetall ធ្លាប់បានប្រកាសជាលើកដំបូងនូវផែនការរបស់ខ្លួន ក្នុងការបង្កើតរោងចក្រមួយកាលពីខែមីនា ដោយក្រុមហ៊ុនបានបញ្ជាក់នៅពេលនោះថា រោងចក្រនេះនឹងចំណាយដើមទុនសាងសង់អស់ ២០០ លានដុល្លារ ហើយនឹងអាចបង្កើតរថក្រោះ Panther ស៊េរីថ្មីបំផុតចំនួន ៤០០ គ្រឿងក្នុងមួយឆ្នាំ ។

ប៉ុន្តែទោះជាយ៉ាងណា លោក Papperger បានប្រាប់ CNN ថា ចំណែករថពាសដែក Fuchs របស់ក្រុមហ៊ុន Rheinmetall នឹងក្លាយជាយានដំបូងបង្អស់ ដែលកើតចេញពីខ្សែសង្វាក់ផលិតកម្ម របស់រោងចក្រនេះ ។

ជាចុងក្រោយលោកបន្ថែមថា កម្មករអ៊ុយក្រែន នឹងត្រូវបណ្តុះបណ្តាលដើម្បីផលិត និងជួសជុលយានទាំងនេះ ក៏ដូចជាផលិតផលផ្សេងទៀតរបស់ក្រុមហ៊ុន Rheinmetall ដែលរួមមានយានប្រយុទ្ធថ្មើរជើង Marder, រថក្រោះ Leopard 2 និងប្រព័ន្ធកាំភ្លើងធំ Panzerhaubitze 2000 ផងដែរ ៕

ប្រែសម្រួល៖ Vann Vann

ប្រភព៖ RT

ចុចអាន៖ កងទ័ពអ៊ុយក្រែន ទៅដល់ចក្រភពអង់គ្លេស ដើម្បីហាត់ប្រើ រថក្រោះ