សារព័ត៌មាន TASS ចុះផ្សាយថា មេបញ្ជាការនាវាមុជទឹក រុស្ស៊ី ត្រូវខ្មាន់​កាំភ្លើងបាញ់សម្លាប់

ទីភ្នាក់ងារសារព័ត៌មានរដ្ឋរុស្ស៊ី TASS បានរាយការណ៍ ដោយយោងតាមប្រភពពីស្ថាប័នអនុវត្តច្បាប់របស់ទីក្រុងមូស្គូថា មេបញ្ជាការនាវាមុជទឹក និងជាអនុប្រធានទទួលបន្ទុកការចល័តយោធានៅក្នុងទីក្រុង Krasnodar ភាគខាងត្បូងនៃប្រទេសរុស្ស៊ី ត្រូវបានខ្មាន់កាំភ្លើងបាញ់សម្លាប់កាលពីថ្ងៃចន្ទ ។

យោងតាមសារព័ត៌មាន TASS បានឲ្យដឹងទៀតថា មន្ត្រីដែលត្រូវបានខ្មាន់កាំភ្លើងបាញ់សម្លាប់នោះមានឈ្មោះ Stanislav Rzhitsky ជាមេបញ្ជាការនាវាមុជទឹកនៃកងនាវាចរសមុទ្រខ្មៅរបស់រុស្ស៊ី ខណៈបណ្តាញព័ត៌មានក្នុងប្រទេសអ៊ុយក្រែនបានអះអាងថា លោកជាអ្នកទទួលខុសត្រូវចំពោះការបាញ់បង្ហោះកាំជ្រួចមីស៊ីលនាំផ្លូវ Kalibr ទៅកាន់គោលដៅនៅក្នុងប្រទេសអ៊ុយក្រែន ។

សារព័ត៌មានរុស្ស៊ីមួយនេះចុះផ្សាយទៀតថា លោក Rzhitsky ដែលជាអ្នកបញ្ជានាវាមុជទឹក Krasnodar ដែលដាក់ឈ្មោះតាមទីក្រុងរបស់រុស្ស៊ី ត្រូវបានខ្មាន់កាំភ្លើងបាញ់ ៤ គ្រាប់ អំឡុងរត់ហាត់ប្រាណពេលព្រឹកនៅលើផ្លូវ Beregovaya ជិតក្លឹបកីឡាមួយកន្លែង ប៉ុន្តែវា​មិន​ច្បាស់ទេ​ថា​តើ​បច្ចុប្បន្នគាត់​ជាមេបញ្ជាការ​ក្រុម​នាវាមុជទឹក​ដដែលឬក៏យ៉ាងណានោះ ។

ពាក់ព័ន្ធនឹងបញ្ហានេះដែរ គណៈកម្មាធិការស៊ើបអង្កេតរុស្ស៊ី បានចាប់ផ្តើមការស៊ើបអង្កេតចំពោះការសម្លាប់លើលោក Rzhitsky ខណៈសមត្ថកិច្ច​ក៏កំពុង​ស្រាវជ្រាវ​រក​មូលហេតុ​នៃ​បទឧក្រិដ្ឋ ជនល្មើស និង​មូលហេតុផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera / TASS