ទឹកកក អង់តាកទិច  រលាយដល់កម្រិតទាបបំផុត ធ្វើឲ្យអ្នកវិទ្យាសាស្ត្រព្រួយបារម្ភខ្លាំង

កាលពីថ្ងៃចន្ទ អង្គការឧតុនិយមពិភពលោក (WMO) បាននិយាយថា ទឹកកកនៃសមុទ្រអង់តាកទិចបានរលាយដល់កម្រិតទាបបំផុត ធ្វើឲ្យអ្នកជំនាញផ្នែកប្រែប្រួលអាកាសធាតុព្រួយបារម្ភ ។

WMO បន្តថា កម្រិតទឹកកកសមុទ្រអង់តាក់ទិកកាលពីខែមុន ដែលជាខែក្តៅបំផុតមិនធ្លាប់មានធ្វើឲ្យទឹកកកសមុទ្រមួយនេះ រលាយដល់កម្រិតទាបជាងធម្មតារហូតដល់ ១៧ ភាគរយឯណោះ ។

ពាក់ព័ន្ធនឹងបញ្ហានេះដែរលោក Michael Sparrow ប្រធានកម្មវិធីស្រាវជ្រាវអាកាសធាតុពិភពលោកបានប្រាប់អ្នកយកព័ត៌មាននៅទីក្រុងហ្សឺណែវ នៃប្រទេសស្វីស ថា “យើងធ្លាប់តែឃើញការរលាយទឹកកកនៅតំបន់អាកទិច ប៉ុន្តែមិនមែននៅតំបន់អង់តាកទិចឡើយ ដូច្នេះវាគឺជាការរលាយដ៏ធំមួយ” ។

យោងតាមការព្រមានរបស់ WMO បានឲ្យដឹងថា ក្នុងខែឧសភា និងខែមិថុនា ឆ្នាំ២០២៣ សីតុណ្ហភាពលើផ្ទៃសមុទ្រពិភពលោកបានកើនឡើងយ៉ាងលឿន ។

ក្រៅពីនេះ លំនាំអាកាសធាតុ El Nino ក៏រំពឹងនឹងធ្វើឲ្យសីតុណ្ហភាពកើនឡើងផងដែរ ទាំងនៅលើដីគោក និងក្នុងមហាសមុទ្រ ដែលបណ្ដាលឲ្យមានរលកកម្ដៅសមុទ្រកាន់តែច្រើន និងសីតុណ្ហភាពកាន់តែក្ដៅ ៕

ប្រែសម្រួល៖ វារី

ប្រភព៖ tuoitrenews

ចុចអាន៖ ទឹកកកសមុទ្រអង់តាក់ទិក រលាយដល់កម្រិតទាបបំផុត