ព័ត៌មានអន្ដរជាតិ

ប្រទះឃើញវត្ថុមានតម្លៃជាងកន្លះលានដុល្លារ ក្នុងសាកសពត្រីបាឡែន នៅប្រទេសអេស្ប៉ាញ

បានផុស

២ years មុន

នៅ

ថ្ងៃព្រហស្បតិ៍ ១៣ កក្កដា ២០២៣

ដោយ

អ្នកវិទ្យាសាស្ត្រលើកោះ Canary នៃទីក្រុង La Palma របស់ប្រទេសអេស្ប៉ាញ នាំគ្នាភ្ញាក់ផ្អើលយ៉ាងខ្លាំង នៅពេលរកឃើញវត្ថុម្យ៉ាងទម្ងន់ ៩.៥ គីឡូក្រាម និងមានតម្លៃជាងកន្លះលានដុល្លារ ដែលគេហៅថា “មាសអណ្ដែត” ក្នុងប្រព័ន្ធរំលាយអាហាររបស់ត្រីបាឡែន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សាកសពត្រីបាឡែនដែលងាប់ដោយសារជំងឺបង្ករោគឈាម ឬ Sepsis បង្កឡើងដោយដុំពកនោះមានប្រវែង ១២.៨ ម៉ែត្រ ។ ចំណែកឯ Ambergris ដែលគេហៅថា “មាសអណ្ដែត” វិញ ជាសារធាតុរឹងបានមកពីក្នុងប្រព័ន្ធរំលាយអាហាររបស់ត្រីបាឡែនអំបូរ Sperm ។

Ambergris ជាវត្ថុកម្រ ហើយមានតែត្រីបាឡែនមួយក្បាលប៉ុណ្ណោះក្នុងចំណោម ១០០ ក្បាល ទើបអាចបង្កើតវាបាន ហើយគេយក Ambergris របស់ត្រីបាឡែនមកធ្វើជាគ្រឿងផ្សំទឹកអប់ថ្លៃៗ ដោយសារតែវាសមត្ថភាពរក្សាក្លិនបានយូរអង្វែង ។

ទន្ទឹមនោះដុំ Ambergris ដែលមានតម្លៃរហូតដល់ ៥៥ ម៉ឺនដុល្លារ ក៏កំពុងដាក់លក់នៅលើទីផ្សារដោយលោក Antonio Fernández Rodríguez ជាអ្នករកឃើញផងដែរ ។ ជាពិសេស គាត់សង្ឃឹមថា ថវិកាដែលបានមកពីការលក់នឹងបានទៅលើកោះ Canary ដែលជាកន្លែងត្រីបាឡែនអណ្ដែតឡើង ៕