លោក បៃដិន និយាយច្រឡំទៀតហើយថា រុស្ស៊ី​ ត្រូវតែ​ឈប់​វាយ​ប្រហារ ​រុស្ស៊ី

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាថ្មីម្តងទៀត ដែលប្រធានាធិបតី​អាមេរិក លោក ចូ បៃដិន បានច្រឡំមាត់ ដោយលើកនេះ គាត់បាននិយាយអំពីឈ្មោះអ៊ុយក្រែន បែរទៅជាច្រឡំឈ្មោះរុស្ស៊ីវិញ នៅឯសុន្ទរកថា ក្នុងកិច្ចប្រជុំកំពូលរបស់អង្គការណាតូ នាទីក្រុង វីលនីញូស នៃប្រទេស លីទុយអានី កាលពីថ្ងៃពុធ ទី១២ ខែកក្កដា។

លោក បៃដិន និយាយថា “រុស្ស៊ី អាចបញ្ចប់សង្រ្គាមនេះនៅថ្ងៃស្អែក ដោយការដកកងកម្លាំងរបស់ខ្លួនចេញពីអ៊ុយក្រែន, កំណត់ព្រំដែនអន្តរជាតិរបស់ខ្លួនឡើងវិញ និងបញ្ឈប់ការវាយប្រហារដ៏អមនុស្សធម៌លើប្រទេសរុស្ស៊ី”។ ប៉ុន្តែគាត់​បាន​កែកំហុសវិញ​យ៉ាង​ឆាប់​រហ័ស​ថា “​ខ្ញុំ​ចង់​និយាយ​ថា​ អ៊ុយក្រែន មិនមែនរុស្ស៊ីទេ​”។

នេះមិនមែនជារឿងថ្មីឡើយដែលលោក បៃដិន និយាយខុស ឬច្រឡំមាត់ ខណៈកាល​ពី​ពីរ​សប្តាហ៍​មុន នៅ​ក្នុង​សន្និសីទ​កាសែត​ខាង​ក្រៅ​សេតវិមាន លោក បៃដិន ​អះអាង រុស្ស៊ី​កំពុង​ចាញ់​សង្គ្រាម​នៅ​អ៊ីរ៉ាក់។

ពេលនោះ លោក បៃដិន បានឆ្លើយសំណួរអ្នកសារព័ត៌មាន ខណៈគាត់ដើរចេញពីសេតវិមាន សំដៅទៅឧទ្ធម្ភាគចក្រប្រធានាធិបតី មុនពេលហោះហើរទៅកាន់ទីក្រុង ឈីកាហ្គោ ដើម្បីថ្លែងសុន្ទរកថាអំពីរបៀបវារៈសេដ្ឋកិច្ច Bidenomics។

សំណួរមួយក្នុងចំណោមសំណួរទាំងនោះគឺថាតើ លោក ពូទីន ពិតជាចុះខ្សោយ ដោយសារតែការបះបោរនាពេលថ្មីៗនេះរបស់ក្រុមហ៊ុនយោធាឯកជន Wagner មែនឬទេ? លោក បៃដិន ឆ្លើយទាំងខុសសំណួរថា “វាពិបាកនិយាយណាស់ ប៉ុន្តែគាត់ច្បាស់ជាចាញ់សង្រ្គាមនៅអ៊ីរ៉ាក់ គាត់ចាញ់សង្រ្គាមនៅផ្ទះ ហើយគាត់បានក្លាយជាអ្នកចាញ់នៅជុំវិញពិភពលោក។ ​វា​មិន​មែនត្រឹម​តែ​ណាតូ​ទេ ហើយវាក៏មិនមែនត្រឹមតែសហភាពអឺរ៉ុបដែរ។ វាជាប្រទេសជប៉ុន វា​ជា​ប្រទេស​ចំនួន៤០”៕

ប្រែសម្រួល៖ Vann Vann

ប្រភព៖ RT

ចុចអាន៖ លោក បៃដិន និយាយខុសទៀតហើយ លើកនេះ ថា ពូទីន កំពុងចាញ់សង្គ្រាមនៅ អ៊ីរ៉ាក់