ក្រុមទាហានស៊ីឈ្នួល Wagner Group ប្រគល់អាវុធមិនទាន់ប្រើរាប់ម៉ឺន​គ្រឿងដល់កងកម្លាំង រុស្ស៊ី (មានវីដេអូ)

អ្នកនាំពាក្យក្រសួងការពារជាតិរុស្ស៊ីលោក Igor Konashenkov បានថ្លែងក្នុងសន្និសីទសារព័ត៌មាននៅទីក្រុងមូស្គូថា ក្រុមទាហានស៊ីឈ្នួល Wagner Group បានប្រគល់សម្ភារៈយោធាចំនួន ២,០០០ គ្រឿង  អាវុធធុនតូច ២០,០០០ គ្រឿង និងគ្រាប់រំសេវ ២.៥ តោន ដល់កងកម្លាំងប្រដាប់អាវុធរុស្ស៊ីកាលពីថ្ងៃពុធ ។

លោក Konashenkov បាននិយាយថា ក្រុមអ្នកប្រយុទ្ធរបស់ទាហានស៊ីឈ្នួល Wagner Group មានសព្វាវុធជាច្រើនរួមទាំង រថក្រោះ ប្រព័ន្ធរ៉ុកកែត កងកាំភ្លើងធំ ប្រព័ន្ធប្រឆាំងរថក្រោះ និងយានយន្តដឹកជញ្ជូនជាដើម ។

អ្នកនាំពាក្យរូបនេះបាន​កត់​សម្គាល់ទៀត​ថា​ ក្នុង​ចំណោម​ឧបករណ៍​ដែល​បានប្រគល់មកឲ្យកងកម្លាំងប្រដាប់អាវុធរុស្ស៊ីនោះ គឺមានអាវុធ​​រាប់​សិប​គ្រឿង​ គឺមិន​ដែល​ត្រូវ​បាន​ប្រើ​លើសមរភូមិ​ប្រយុទ្ធ​នោះ​ទេ ។

លោក Konashenkov បានបញ្ជាក់ថា គ្រឿងបរិក្ខារ និងសព្វាវុធទាំងអស់កំពុងត្រូវបានបញ្ជូនទៅកាន់ឃ្លាំងស្តុកអាវុធ ដែលជាកន្លែងជួសជុល និងស្តារឡើងវិញសម្រាប់កងកម្លាំងប្រដាប់អាវុធរុស្ស៊ី ដើម្បីយកទៅប្រើប្រាស់ទៅតាមគោលបំណងប្រយុទ្ធរបស់ពួកគេ ។

គួរបញ្ជាក់ថា ក្រុមទាហានស៊ីឈ្នួល Wagner Group ដែលដឹកនាំដោយលោក Prigozhin បានប៉ុនប៉ងបះបោរប្រដាប់អាវុធប្រឆាំងនឹងទីក្រុងមូស្គូកាលពីថ្ងៃទី២៤ ខែមិថុនា ហើយបីថ្ងៃក្រោយមកក្រុមទាហានស៊ីឈ្នួលបានភៀសខ្លួនទៅបេឡារុស ក្រោយមានកិច្ចសម្របសម្រួលពីលោកប្រធានាធិបតី Alexander Lukashenko ជាមួយនឹងលោកប្រធានាធិបតីរុស្ស៊ី Vladimir Putin ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ រុស្ស៊ី ដឹងពីអ្វីដែលត្រូវធ្វើហើយដើម្បីតបតទៅ ហ្វាំងឡង់ និងស៊ុយអែត ដែលចូលជាសមាជិក ណាតូ