Amazon ចាត់ទុក​ព្រឹត្តិការណ៍​ Prime Day ឆ្នាំនេះ គឺអស្ចារ្យបំផុត

ក្នុងរយៈពេលតែ ២ ថ្ងៃប៉ុណ្ណោះ ពោលចាប់ពីថ្ងៃអង្គារដល់ថ្ងៃពុធ ព្រឹត្តិការណ៍ Amazon’s Prime Day Promotion របស់ក្រុមហ៊ុន Amazon លក់ផលិតផល​បានរហូតដល់ ៣៧៥ លានមុខនៅទូទាំងពិភពលោក ខណៈការបញ្ជាទិញទំនិញតាមអនឡាញនៅសហរដ្ឋអាមេរិកបានកើនឡើង ៦.១ ភាគរយ​ ស្មើ ១២.៧ ពាន់លានដុល្លារ ។  

ទន្ទឹមនោះ Amazon ក៏ចាត់ទុកព្រឹត្តិការណ៍ Prime Day នៅឆ្នាំនេះ ជាព្រឹត្តិការណ៍ដ៏ធំបំផុតមិនធ្លាប់មានសម្រាប់ប្រវត្តិសាស្ត្រ​ក្រុមហ៊ុនផងដែរ ដោយសារតែអតិថិជននៅទូទាំងពិភពលោកបានបញ្ជាទិញទំនិញដ៏ច្រើនសន្ធឹកសន្ធាប់បែបនេះក្នុងរយៈពេល ២ ថ្ងៃ ហើយបានកើនឡើងពី ៣០០ លានមុខដែលបានលក់កាលពីឆ្នាំមុន ។

ស្របពេលជាមួយគ្នានេះ ក្រុមហ៊ុនបញ្ជាក់ថា ទំនិញដែលមានការពេញនិយមលក់ដាច់បំផុតនោះ​ គឺ​សម្ភារៈផ្ទះបាយ សម្លៀកបំពាក់ និងគ្រឿងសម្អាង ។

គួរបញ្ជាក់ថា Prime Day ជាព្រឹត្តិការណ៍​លក់ទំនិញ​បញ្ចុះតម្លៃដល់អតិថិជន ហើយវាក៏ជាព្រឹត្តិការណ៍ទាក់ទាញអតិថិជនថ្មីរបស់ក្រុមហ៊ុន Amazon ផងដែរ ខណៈព្រឹត្តិការណ៍នេះបានចាប់ផ្តើមដំបូង​នៅ​ក្នុងឆ្នាំ ២០១៥ ៕

ប្រែសម្រួល៖ នាង រតនៈ

ប្រភព៖ CNBC