ទឹកជំនន់ វាយប្រហារទូទាំងទ្វីបអាស៊ី សម្លាប់មនុស្សរាប់រយនាក់ 

មនុស្សរាប់រយនាក់ ត្រូវបាត់បង់ជីវិតនៅទូទាំងទ្វីបអាស៊ីក្នុងខែកក្កដា ដោយសារតំបន់ដ៏ធំមួយនេះ ជួបប្រទះនឹងរដូវភ្លៀងមូសុងយ៉ាងខ្លាំងក្លា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពីរសប្តាហ៍កន្លងមក មានភ្លៀងធ្លាក់ខ្លាំង ដែលបង្កជាគ្រោះទឹកជំនន់ និងបំណាក់ដី នៅទូទាំងប្រទេសជាច្រើន រួមមានឥណ្ឌា ចិន និងជប៉ុន ជាដើម។ ជាលទ្ធផល មនុស្សរាប់សែននាក់ ត្រូវបានបង្ខំឲ្យជម្លៀសចេញពីផ្ទះសម្បែងរបស់ពួកគេ។

កាល​ពី​ថ្ងៃ​សុក្រទី១៤ខែកក្កដា ប្រទេស​កូរ៉េ​ខាង​ត្បូង​ បាន​ប្រកាសអាសន្ន ខណៈ​ព្យុះមួយ ​វាយ​ប្រហារ​រដ្ឋធានី​សេអ៊ូល ខណៈ​មន្ត្រី​ហ្វីលីពីន ក៏​បាន​ព្រមាន​អំពី​ព្យុះ​ស៊ីក្លូន​ត្រូពិកផងដែរ។

ហើយកាលពីដើមសប្តាហ៍នេះ ប្រទេសជប៉ុន បានរាយការណ៍អំពីគ្រោះទឹកជំនន់ធ្ងន់ធ្ងរបំផុតមិនធ្លាប់មានក្នុងកំណត់ត្រាលើកោះ Kyushu ដែលនៅទីនោះ មនុស្សយ៉ាងតិច៨នាក់ រួមទាំងអ្នកនយោបាយក្នុងស្រុកម្នាក់ផងដែរ បានស្លាប់ ខណៈអ្នកផ្សេងទៀតបាត់ខ្លួន។

នៅទីក្រុងសេអ៊ូល មនុស្ស១៣៥នាក់ ត្រូវបានជម្លៀសចេញពីផ្ទះ ពេលដែលភ្លៀងធ្លាក់យ៉ាងគំហុក បានវាយប្រហាររដ្ឋធានីរបស់ប្រទេសកូរ៉េខាងត្បូងមួយនេះ។

ដោយឡែក ប្រទេស​ចិន និង​ឥណ្ឌា​ បាន​ជួបប្រទះ​ភ្លៀង​ធ្លាក់​ខ្លាំង​ជា​ច្រើន​សប្តាហ៍​រួច​មក​ហើយដោយ​បាន​បង្ក​ឲ្យ​មាន​ការ​ខូច​ខាត​ធំធេង ​នៅ​តំបន់​ផ្សេងៗ​គ្នា។

នៅភាគខាងជើងប្រទេសឥណ្ឌា អាជ្ញាធរនិយាយថា មនុស្សជិត១០០នាក់បានស្លាប់ ក្នុងរយៈពេលពីរសប្តាហ៍កន្លងមកនេះ ដោយសារការបាក់ដី ជំនន់ទឹកភ្លៀង និងការបាក់អគារ។ ភ្លៀងធ្លាក់ខ្លាំងមិនធម្មតា ក៏បានសម្លាប់មនុស្សជាច្រើននាក់ និងបង្កការខូចខាតដល់ហេដ្ឋារចនាសម្ព័ន្ធទូទាំងប្រទេសចិនផងដែរ។

រីឯនៅភាគខាងត្បូងប្រទេសហ្វីលីពីនឯណោះវិញ ជំនន់ទឹកភ្លៀង បានវាយប្រហារ អំឡុងពេលព្រឹកដ៏មមាញឹកកាលពីថ្ងៃព្រហស្បតិ៍ ដោយបណ្តាលឲ្យមានការកកស្ទះចរាចរណ៍ចម្ងាយ១៧គីឡូម៉ែត្រ នៅលើផ្លូវហាយវេដ៏សំខាន់មួយដែលឆ្ពោះទៅកាន់រដ្ឋធានី ម៉ានីល។

អ្នកវិទ្យាសាស្ត្រព្រមានថា ការប្រែប្រួលអាកាសធាតុ បានបង្កើនហានិភ័យនៃគ្រោះទឹកជំនន់នៅទូទាំងពិភពលោក។ ប្រទេសជាច្រើនកំពុងតស៊ូដើម្បីកាត់បន្ថយគ្រោះថ្នាក់នៃអាកាសធាតុកាចសាហាវ៕

ប្រែសម្រួល៖ Vann Vann

ប្រភព៖ BBC

ចុចអាន៖ សហរដ្ឋអាមេរិក កំពុងរងទុក្ខខ្លាំង ព្រោះត្រូវជួបគ្រោះទឹកជំនន់ផង និងរលកកម្តៅផង