វៀតណាម ចាប់បានជនសង្ស័យបន្ថែមទៀតក្នុងការវាយប្រហារប្រដាប់​អាវុធនៅខេត្តជាប់ កម្ពុជា

វៀតណាមបន្តចាប់បានជនសង្ស័យចំនួន ៣ នាក់ទៀតដែលជាប់ពាក់ព័ន្ធនឹងការវាយប្រហារភេរវកម្មនៅសាលាឃុំចំនួន ២ ក្នុងខេត្ត Dak Lak ដែលមានព្រំប្រទល់ជាប់ខេត្តមណ្ឌលគិរីរបស់ព្រះរាជាណាចក្រកម្ពុជា ។

ជនសង្ស័យទាំង ៣ នាក់នោះមានឈ្មោះ Nay Yen អាយុ ៥៣ ឆ្នាំ, Nay Tam អាយុ ៤៩ ឆ្នាំ និង Y Ju Nie អាយុ ៥៥ ឆ្នាំ ត្រូវប៉ូលិសខេត្ត Dak Lak ចាប់ខ្លួនបាននៅថ្ងៃសៅរ៍នេះនៅចម្ងាយ ១០០ គីឡូម៉ែត្រពីកន្លែងកើតហេតុ ។

គួររំឭកឡើងវិញថា កាលពីថ្ងៃទី១១ ខែមិថុនា ក្រុមប្រដាប់អាវុធចំនួន ២ បានបើកការវាយប្រហារលើការិយាល័យគណៈកម្មាធិការប្រជាជននៅឃុំ Ea Ktur និង Ea Tieu ក្នុងខេត្ត Dak Lak ដោយបានសម្លាប់មន្ត្រី ប៉ូលិស និងជនស៊ីវិលចំនួន ៩ នាក់ ខណៈរហូតមកដល់ពេលនេះ ជនសង្ស័យប្រមាណ ៩០ នាក់ហើយត្រូវបានចាប់ខ្លួនពីបទឧក្រិដ្ឋកម្មជាច្រើន រួមទាំងអំពើភេរវកម្មផងដែរ ។

យោងតាមប្រភពផ្លូវការបានឲ្យដឹងថា ជនសង្ស័យម្នាក់ក្នុងចំណោមអ្នកដែលត្រូវបានចាប់ខ្លួនទាំងនោះ គឺជាសមាជិកនៃអង្គការភេរវកម្មមានមូលដ្ឋាននៅសហរដ្ឋអាមេរិក ដែលបានទទួលការណែនាំឲ្យចូលមកប្រទេសវៀតណាម និងរៀបចំផែនការវាយប្រហារ ។

ទន្ទឹមនោះ បន្ទាប់ពីការវាយប្រហារនេះហើយ ប៉ូលិសក៏បានរឹបអូសអាវុធជាច្រើនរួមមាន កាំភ្លើង ២៣ ដើម, គ្រាប់បែកដៃ ២ គ្រាប់, គ្រាប់កាំភ្លើង ១,២០០ គ្រាប់, ឧបករណ៍បំផ្ទុះ ១៥ គ្រឿង, កាំបិត ៣០ ដើម និងសម្ភារផ្ទុះ ១.២ គីឡូក្រាម ខណៈអាជ្ញាធរក៏​កំពុង​ស្វែង​រក​ការចាប់ខ្លួនជនសង្ស័យចំនួន ៣ នាក់បន្ថែមទៀតផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ VN Express

ចុចអាន ៖ លោក ភីថា នឹងចោលតំណែងនាយករដ្ឋមន្ត្រី បើនៅតែបរាជ័យក្នុងការ បោះឆ្នោតសភា