ពូទីន ព្រមានសងសឹកចាស់ដៃ បើអ៊ុយក្រែន ប្រើប្រាស់គ្រាប់បែកចង្កោម

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានព្រមានថា ប្រសិនបើអ៊ុយក្រែន ប្រើប្រាស់គ្រាប់បែកចង្កោមដែលផ្គត់ផ្គង់ដោយសហរដ្ឋអាមេរិកនៅលើសមរភូមិមែននោះ ទីក្រុងមូស្គូសូមរក្សាសិទ្ធិក្នុងការសងសឹក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ពូទីន បានព្រមានបែបនេះកាលពីថ្ងៃអាទិត្យទី១៦ខែកក្កដា ខណៈពេលថ្លែងទៅកាន់អ្នកកាសែត Pavel Zarubin ពាក់ព័ន្ធការសម្រេចចិត្តរបស់រដ្ឋបាលប្រធានាធិបតីអាមេរិក ចូ បៃដិន ក្នុងការផ្តល់ឲ្យអ៊ុយក្រែននូវគ្រាប់បែកចង្កោម ដែលត្រូវបានហាមឃាត់នៅក្នុងប្រទេសជាង១០០ ដោយសារហានិភ័យ ដល់ជនស៊ីវិល។

លោកពូទីននិយាយថា “មួយរយៈមុន រដ្ឋបាលអាមេរិកខ្លួនឯង បានផ្តល់ការវាយតម្លៃលើគ្រាប់បែកទាំងនេះតាមរយៈមាត់បុគ្គលិករបស់ខ្លួន ដោយហៅការប្រើប្រាស់គ្រាប់បែកទាំងនេះ ថាជាឧក្រិដ្ឋកម្ម។ ដូច្នេះ​ខ្ញុំ​គិត​ថា អាមេរិក កំពុងប្រព្រឹត្តឧក្រិដ្ឋកម្ម”។

ជាក់ស្តែង ប្រធានាធិបតីរុស្ស៊ី បានសំដៅទៅលើសេចក្តីថ្លែងការណ៍ ដែលធ្វើឡើងដោយអតីតអ្នកនាំពាក្យសេតវិមានលោកស្រី Jen Psaki កាលពីចុងខែកុម្ភៈ ឆ្នាំ២០២២ ពោលគឺត្រឹមតែប៉ុន្មានថ្ងៃប៉ុណ្ណោះ បន្ទាប់ពីជម្លោះអ៊ុយក្រែនផ្ទុះឡើង ដែលពេលនោះលោកស្រីនិយាយថា ការប្រើប្រាស់អាវុធដ៏ចម្រូងចម្រាសបែបនេះ អាចចាត់ទុកថាជាឧក្រិដ្ឋកម្មសង្គ្រាម។

មេដឹកនាំរុស្ស៊ីលើកឡើងថា សហរដ្ឋអាមេរិក បានអនុវត្តវិធានការនេះ ដោយសារពួកគេខ្វះគ្រាប់។ ការប្រើប្រាស់គ្រាប់ផ្លោងរបស់អ៊ុយក្រែន គឺលើសពីឃ្លាំងស្តុកបច្ចុប្បន្ន​ របស់ប្រទេសលោកខាងលិច ឆ្ងាយណាស់។

គួរបញ្ជាក់ជាថ្មី ទីក្រុងវ៉ាស៊ីនតោន បានប្រកាសអំពីការសម្រេចចិត្តបញ្ជូនគ្រាប់បែកចង្កោម ទៅកាន់ទីក្រុងកៀវកាលពីដើមខែកក្កដា ហើយថ្មីៗនេះ មន្ត្រីអាមេរិកបញ្ជាក់ថា គ្រាប់បែកដ៏ចម្រូងចម្រាស បានមកដល់ដៃអ៊ុយក្រែនរួចទៅហើយ៕

ប្រែសម្រួល៖ Vann Vann

ប្រភព៖ RT

ចុចអាន៖ ៣ ចំណុចសំខាន់ៗអំពីរឿងរ៉ាវគ្រាប់បែកចង្កោមដែល អាមេរិក ផ្ដល់ទៅឲ្យ អ៊ុយក្រែន