ដឹងទេ អាមេរិក ប្រើគ្រាប់បែកចង្កោមលើកចុងក្រោយក្នុងឆ្នាំណា និងនៅ​ប្រទេសណា?

ប្រធានាធិបតីអាមេរិកលោក ចូ បៃដិន បានបញ្ជាក់កាលពីថ្ងៃសុក្រសប្ដាហ៍មុនថា សហរដ្ឋអាមេរិកបានផ្ដល់គ្រាប់បែកចង្កោមទៅឲ្យអ៊ុយក្រែនសម្រាប់ប្រើប្រាស់ក្នុងប្រតិបត្តិការសឹកប្រឆាំងនឹងរុស្ស៊ីរួចហើយ ខណៈចំណាត់ការនេះក៏កើតឡើងទាំងចម្រូសចម្រាសផងដែរ ដោយសារតែអាមេរិកធ្លាប់បានថ្កោលទោសចំពោះការប្រើប្រាស់អាវុធបែបនេះ ។

ពាក់ព័ន្ធនឹងបញ្ហានេះដែរ ក៏មានសំនួរជាច្រើនចង់ដឹងថា តើអាមេរិកដែលតែងតែផ្ដល់គ្រាប់បែកចង្កោមទៅឲ្យប្រទេសផ្សេង ជាពិសេសផ្គត់ផ្គង់ទៅឲ្យអ៊ុយក្រែនកាលពីពេលលថ្មីៗនេះ ចុះចំណែករដ្ឋាភិបាលទីក្រុងវ៉ាស៊ីនតោនខ្លួនឯងវិញនោះ នៅតែប្រើសព្វាវុធបែបនេះដែរឬក៏យ៉ាងណា?

ចម្លើយនោះគឺថា ការប្រើប្រាស់គ្រាប់បែកចង្កោមចុងក្រោយបំផុតពីសំណាក់សហរដ្ឋអាមេរិក បានកើតឡើងនៅក្នុងប្រទេសយេម៉ែនកាលពីឆ្នាំ ២០០៩ ដល់ឆ្នាំ ២០១៦ ។ សហរដ្ឋអាមេរិកបានប្រើប្រាស់គ្រាប់បែកចង្កោមក្នុងចំនួនដ៏ច្រើនក្នុងឆ្នាំ ២០០៩ អំឡុងពេលការលុកលុយលើប្រទេសអ៊ីរ៉ាក់ និងនៅអាហ្វហ្គានីស្ថាន ។

ទន្ទឹមនោះ រហូតដល់ឆ្នាំ ២០១៦ សហរដ្ឋអាមេរិកនៅតែបន្តប្រើគ្រាប់បែកចង្កោមទៀត ហើយព័ស្តុតាងនោះបានមកពីក្រុមចម្រុះដឹកនាំដោយអារ៉ាប៊ីសាអូឌីត ។ ក្នុងនោះក្រុមចម្រុះមួយនេះបានប្រើប្រាស់គ្រាប់បែកចង្កោមដែលផ្គត់ផ្គង់ដោយសហរដ្ឋអាមេរិកក្នុងសង្គ្រាមរបស់ខ្លួនប្រឆាំងនឹងកងកម្លាំង Houthi នៅយេម៉ែន ។

ជាទូទៅ គ្រាប់បែកចង្កោមសំដៅទៅលើប្រភេទគ្រាប់ផ្លោងដែលហោះពីលើអាកាស ហើយបញ្ចេញសារធាតុផ្ទុះតូចៗមួយចំនួននៅលើផ្ទៃដី បន្ទាប់ពីវាត្រូវបានបាញ់ដោយកាំភ្លើងធំ កាំភ្លើងកងទ័ពជើងទឹក គ្រាប់រ៉ុកកែត ឬទម្លាក់ពីលើយន្តហោះជាដើម ។

គួរបញ្ជាក់ថា ការប្រើប្រាស់គ្រាប់បែកចង្កោមក៏ត្រូវបានថ្កោលទោសដោយអង្គការសិទ្ធិមនុស្សអន្តរជាតិជាច្រើនផងដែរ ដោយសារតែគ្រាប់បែកប្រភេទនេះរហូតដល់ ៤០ ភាគរយ​មិនផ្ទុះភ្លាមៗនោះទេ ប៉ុន្តែវា​អាចសម្លាប់មនុស្ស ឬបណ្តាលឲ្យពិការ នៅ​ប៉ុន្មាន​ឆ្នាំ​ ឬ​ច្រើន​ទសវត្សរ៍ បន្ទាប់​ពី​វារាយប៉ាយ ។ ជាក់ស្ដែងចាប់តាំងពីសង្គ្រាមលោកលើកទី ២ មក គ្រាប់បែកចង្កោមបានសម្លាប់ជនស៊ីវិលប្រមាណពី ៥៦,៥០០ នាក់ទៅ ៨៦,៥០០ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ៣ ចំណុចសំខាន់ៗអំពីរឿងរ៉ាវគ្រាប់បែកចង្កោមដែល អាមេរិក ផ្ដល់ទៅឲ្យ អ៊ុយក្រែន

ចុចអាន ៖ លោក បៃដិន ប្រាប់លក្ខខណ្ឌ និងពេលវេលាដែល អ៊ុយក្រែន ស័ក្តិសមចូល ជាសមាជិកអង្គការណាតូ