កូរ៉េខាងជើង បាញ់មីស៊ីល២គ្រាប់ទៀត ក្រោយពេល នាវាមុជទឹកអាមេរិក មកដល់ កូរ៉េខាងត្បូង

ប្រទេសកូរ៉េខាងជើង បានបាញ់មីស៊ីលបាលីស្ទិក ចំនួន២គ្រាប់ ឆ្ពោះទៅទិសខាងកើតនៅព្រឹកព្រលឹមថ្ងៃពុធទី១៩ខែកក្កដា ពោលគឺត្រឹមតែប៉ុន្មានម៉ោងប៉ុណ្ណោះ បន្ទាប់ពីនាវាមុជទឹកអាមេរិក មកដល់កំពង់ផែកូរ៉េខាងត្បូង ជាលើកដំបូងក្នុងរយៈពេល៤ទសវត្សរ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការពារជាតិជប៉ុននិយាយថា មីស៊ីលទាំងពីរនេះ ហាក់ដូចជាធ្លាក់នៅខាងក្រៅតំបន់សេដ្ឋកិច្ចផ្តាច់មុខរបស់ខ្លួន ខណៈអគ្គសេនាធិការចម្រុះរបស់កូរ៉េខាងត្បូង (JCS) ក៏បានអំពាវនាវឲ្យ ទីក្រុងព្យុងយ៉ាង បញ្ឈប់ការបាញ់បង្ហោះបែបនេះតទៅទៀតផងដែរ ។

JCS បាននិយាយក្នុងសេចក្តីថ្លែងការណ៍មួយថា “យើងសូមថ្កោលទោសខ្លាំងៗ ចំពោះការបាញ់មីស៊ីលផ្លោងជាប់ៗគ្នារបស់កូរ៉េខាងជើង ថាជាទង្វើបង្កហេតុដ៏ធ្ងន់ធ្ងរ ដែលបំផ្លាញសន្តិភាព និងស្ថិរភាពនៃឧបទ្វីបកូរ៉េ ក៏ដូចជាសហគមន៍អន្តរជាតិ។​ ការបាញ់បង្ហោះនេះ បានបំពានយ៉ាងច្បាស់ លើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ”។

ទន្ទឹមនោះ យោធាសហរដ្ឋអាមេរិកក៏បានដឹងអំពីការបាញ់មីស៊ីលនេះផងដែរ ហើយកំពុងពិគ្រោះយោបល់យ៉ាងជិតស្និទ្ធជាមួយសម្ព័ន្ធមិត្ត និងដៃគូ។

គួរបញ្ជាក់ថា ការបាញ់នេះកើតឡើងជិតមួយសប្តាហ៍ បន្ទាប់ពីកូរ៉េខាងជើង បានសាកល្បងមីស៊ីលឆ្លងទ្វីប Hwasong-18 ចុងក្រោយរបស់ខ្លួន ដែលទីក្រុងព្យុងយ៉ាងនិយាយថា ការបាញ់នោះគឺជាការព្រមានដល់សហរដ្ឋអាមេរិក និងសត្រូវដទៃទៀត។

ស្របពេលជាមួយគ្នានោះ ការបាញ់លើកចុងក្រោយនេះ ក៏កើតឡើងផងដែរ បន្ទាប់ពីទាហាន​អាមេរិក​ម្នាក់ ​បាន​រត់​ឆ្លង​កាត់​ព្រំដែន​អន្តរកូរ៉េ​ ចូល​ទៅ​ក្នុង​ប្រទេស​កូរ៉េ​ខាង​ជើង ដោយទីក្រុងវ៉ាស៊ីនតោន និយាយថា ទាហានរូបនេះត្រូវបានកូរ៉េខាងជើងឃុំឃាំង ដែលជាហេតុបង្កើតឲ្យមានវិបត្តិថ្មីរវាងសត្រូវទាំងពីរ៕

ប្រែសម្រួល៖ Vann Vann

ប្រភព៖ CNA

ចុចអាន៖ ប្អូនស្រី គីម ជុងអ៊ុន ថា ការបាញ់មីស៊ីល Hwasong-18 គ្រាន់តែជាសញ្ញា ផ្ដើមការវាយលុយរបស់ កូរ៉េខាងជើង ប៉ុណ្ណោះ