លោក ត្រាំ ប្រកាសឲ្យអឺរ៉ុប ត្រៀមខ្លួនសងលុយអាមេរិក សម្រាប់អាវុធដែលបញ្ជូនទៅ អ៊ុយក្រែន

អតីតប្រធានាធិបតីអាមេរិក លោក ដូណាល់ ត្រាំ បានប្រកាស តម្រូវឲ្យសម្ព័ន្ធមិត្តអឺរ៉ុប ត្រូវបង់ប្រាក់សម្រាប់សព្វាវុធអាមេរិក ដែលត្រូវបានបញ្ជូនទៅឲ្យទីក្រុងកៀវ ចំពេលប្រទេសអ៊ុយក្រែន កំពុងមានជម្លោះជាមួយរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ បានប្រកាសបែបនេះ នៅក្នុងវីដេអូឃោសនាបោះឆ្នោតមួយ ដែលបង្ហោះកាលពីថ្ងៃអង្គារទី១៨ខែកក្កដា ដោយប្តេជ្ញាថា លោកនឹងឲ្យអឺរ៉ុប បំពេញឃ្លាំងអាវុធរបស់សហរដ្ឋអាមេរិកឡើងវិញ ប្រសិនបើលោកជាប់ឆ្នោតជាប្រធានាធិបតីម្តងទៀតនៅឆ្នាំ២០២៤។

លោកអះអាងថា អ្នកស្នងតំណែងគឺលោក ចូ បៃដិន បានចំណាយខ្ជះខ្ជាយចំពោះទីតាំងយោធាដ៏រឹងមាំដែល​លោក​បានកសាង​ឡើង ​បន្ទាប់​ពី​ចូល​កាន់​តំណែង​ក្នុង​ឆ្នាំ ២០១៧។

លោក ត្រាំ លើកឡើងថា “ខ្ញុំនឹងស្នើឲ្យអឺរ៉ុបផ្តល់សំណងមកយើងវិញ សម្រាប់ការចំណាយលើការកសាងឃ្លាំងស្តុកជាថ្មី ហើយពួកគេគួរតែធ្វើនៅពេលនេះ ប៉ុន្តែលោក ចូ បៃដិន ខ្សោយពេក ទើបមិនមានអ្នកគោរពដូច្នេះ”។

គួរបញ្ជាក់ថា រឿងនេះកើតឡើងពីរថ្ងៃ បន្ទាប់ពីលោកត្រាំ ដាក់ចេញផែនការដើម្បីនាំមកនូវកិច្ចព្រមព្រៀងសន្តិភាពដល់ រុស្ស៊ី-អ៊ុយក្រែន ក្នុងរយៈពេល ត្រឹម២៤ម៉ោង។

បេក្ខជនឈានមុខខាងគណបក្សសាធារណរដ្ឋរូបនេះ អះអាងថា លោកមានឥទ្ធិពលគ្រប់គ្រាន់ជាមួយប្រធានាធិបតីរុស្ស៊ី លោក វ្ល៉ាឌីមៀរ ពូទីន និងប្រធានាធិបតីអ៊ុយក្រែនលោក វ្ល៉ាឌីមៀរ ហ្សេលេនស្គី ដើម្បីបញ្ឈប់ការបង្ហូរឈាម៕

ប្រែសម្រួល៖​ Vann Vann

ប្រភព៖ RT

ចុចអាន៖ លោក ត្រាំ ដាក់ចេញផែនការ នាំសន្តិភាព ឲ្យ រុស្ស៊ីនិងអ៊ុយក្រែន ក្នុងពេលត្រឹម ២៤ម៉ោង