ធម្មជាតិកំពុងសងសឹកមនុស្សវិញ ដោយភពផែនដី ប្រកាសអាសន្នគ្រោះមហន្តរាយ

តំបន់ធំៗនៃទ្វីបអឺរ៉ុបភាគខាងត្បូង និងខាងកើត ត្រូវប្រកាសអាសន្នអំពីរលកកម្តៅ ខណៈអង្គការឧតុនិយមពិភពលោក (WMO) ក៏បានព្រមាន អំពីការកើនឡើងហានិភ័យនៃមនុស្សស្លាប់ផងដែរ បន្ទាប់ពីអាកាសធាតុកាចសាហាវកំពុងគ្របដណ្តប់ទ្វីបអាស៊ី និងសហរដ្ឋអាមេរិក ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កោះ Sardinia នៃប្រទេសអ៊ីតាលី បានជួបប្រទះសីតុណ្ហភាពខ្ពស់ជាង ៤៧ អង្សាសេកាលពីថ្ងៃអង្គារ ហើយអ្នកព្យាករនិយាយថា សីតុណ្ហភាពអាចឡើងលើស ៤០ អង្សាសេនៅក្នុងទីក្រុងមួយចំនួនរបស់អ៊ីតាលី ដូចជា Lazio ជាដើម។

ពាក់ព័ន្ធនឹងបញ្ហានេះដែរ មជ្ឈមណ្ឌលសម្របសម្រួលការឆ្លើយតបបន្ទាន់ របស់សហភាពអឺរ៉ុប ក៏បានចេញការជូនដំណឹងពណ៌ក្រហម សម្រាប់សីតុណ្ហភាពខ្ពស់នៅក្នុងតំបន់ដ៏នៃប្រទេសអ៊ីតាលី ភាគឦសានប្រទេសអេស្ប៉ាញ ក្រូអាត ស៊ែប៊ី ភាគខាងត្បូងប្រទេសបូស្នៀ-ហឺហ្សេហ្គោវីណា និងម៉ុងតេណេក្រូ។

នៅអ៊ីតាលី បុគ្គលិកការពារជនស៊ីវិល បានតាមឃ្លាំមើលមនុស្សនៅកណ្តាលទីក្រុងរ៉ូម ខណៈក្រុមកាកបាទក្រហមនៅព័រទុយហ្គាល់ បានប្រើប្រព័ន្ធផ្សព្វផ្សាយសង្គម ដើម្បីព្រមានប្រជាជនកុំឲ្យទុកសត្វចិញ្ចឹម ឬកុមារនៅក្នុងឡានដែលចតចោល ។ ចំណែកប្រទេសក្រិក អ្នកស្ម័គ្រចិត្ដបានចែកទឹកផឹក ហើយនៅអេស្ប៉ាញវិញ ពួកគេបានដាស់តឿនប្រជាជន ឲ្យចេះពីរបៀបដកដង្ហើមក្នុងពេលមានផ្សែងពីភ្លើងឆេះព្រៃ។

ដោយឡែក ប្រទេសជប៉ុន បានចេញការព្រមានអំពីជំងឺដាច់សរសៃឈាមខួរក្បាល នៅខេត្តចំនួន៣២ក្នុងចំណោម៤៧ ខណៈមនុស្សយ៉ាងតិច៦០នាក់ កំពុងទទួលការព្យាបាលជំងឺនេះ។

ទោះបីជាយ៉ាងណាក៏ដោយ ​នៅ​តំបន់​អាស៊ី សីតុណ្ហភាព​ខ្ពស់បំផុតក្នុង​កំណត់ត្រា ​បាន​បង្ក​ជា​ភ្លៀង​ធ្លាក់​យ៉ាង​ខ្លាំងក្លា ។ ជាក់ស្ដែងមនុស្សជិត ២៦ ម៉ឺននាក់ត្រូវបានជម្លៀស នៅភាគខាងត្បូងប្រទេសចិន និងវៀតណាម មុនពេលព្យុះទីហ្វុង Talim បោកបក់មកដល់ ។

គួរបញ្ជាក់ថា អ្នកវិទ្យាសាស្ត្របានព្រមានជាយូរមកហើយពីការបម្រែបម្រួលអាកាសធាតុ ដែលបណ្តាលមកពីការបំភាយឧស្ម័នផ្ទះកញ្ចក់ ភាគច្រើនពីការដុតឥន្ធនៈហ្វូស៊ីល នឹងធ្វើឲ្យរលកកម្តៅកើតឡើងកាន់តែញឹកញាប់ ធ្ងន់ធ្ងរ និងកាចសាហាវ ។ ក្នុងនោះពួកគេនិយាយថា រដ្ឋាភិបាលនានា ចាំបាច់ត្រូវចាត់វិធានការម៉ឺងម៉ាត់ ដើម្បីកាត់បន្ថយការបំភាយឧស្ម័ន ៕

ប្រែសម្រួល៖ Vann Vann

ប្រភព៖ Aljazeera

ចុចអាន៖ រលកកម្តៅ ជា “ឃាតកលាក់មុខ” សម្លាប់មនុស្សបន្តបន្ទាប់ នៅអឺរ៉ុប