Breaking News! សភា ថៃ ចាប់ផ្ដើមសម័យប្រជុំរួមគ្នាជុំទី ២ ដើម្បីបោះឆ្នោត​ជ្រើសរើសនាយករដ្ឋមន្ត្រី

សម័យប្រជុំរួមគ្នានៃរដ្ឋសភា និងព្រឹទ្ធសភាថៃដើម្បីបោះឆ្នោតជ្រើសរើសនាយករដ្ឋមន្ត្រីជុំទី ២ បានចាប់ផ្ដើមហើយនៅថ្ងៃពុធ ទី១៩ ខែកក្កដា ឆ្នាំ២០២៣ នេះ ខណៈក្រុមចម្រុះទាំង ៨ ដែលដឹកនាំដោយគណបក្សចលនាឆ្ពោះទៅមុខ បានសម្រេចចិត្តបន្តតែងតាំងលោក Pita Limjaroenrat ជាបេក្ខជននាយករដ្ឋមន្ត្រីតែម្នាក់ឯងដដែលកាលពីពេលវេលាម៉ោង ៩ និង ៣៨ នាទីព្រឹកនេះ ។

លោក Pita បានបរាជ័យក្នុងការបោះឆ្នោតជ្រើសរើសជានាយករដ្ឋមន្ត្រីថៃកាលពីជុំទី ១ នៅក្នុងសម័យប្រជុំរួមគ្នានៃរដ្ឋសភា និងព្រឹទ្ធសភាកាលពីថ្ងៃព្រហស្បតិ៍ ទី១៣ ខែកក្កដា ដោយទទួលបានសំឡេងត្រឹមតែ ៣២៤ ប៉ុណ្ណោះ ពោលមិនគ្រប់សំឡេង ៣៧៦ ដើម្បីក្លាយជានាយករដ្ឋមន្ត្រីនោះទេ ខណៈមានសំឡេងជំទាស់ចំនួន ១៨២ និងអនុបវាទ ១៩៩ ។

ទោះយ៉ាងណា ប្រសិនបើគណបក្សរបស់លោក Pita នៅតែមិនទទួលបានសំឡេងគាំទ្រគ្រប់គ្រាន់នៅក្នុងការបោះឆ្នោតជុំបន្ទាប់ទៀតនោះ លោកនឹងអនុញ្ញាតឲ្យដៃគូធំទី ២ គឺបក្សភឿថៃចូលកាន់តំណែងជាមេដឹកនាំសម្ព័ន្ធភាពមួយនេះ ហើយលោកក៏គាំទ្រឲ្យមានបេក្ខភាពនាយករដ្ឋមន្ត្រីមកពីភឿថៃផងដែរ ។

ចំណែកដើមចមធ្វើឲ្យសមាជិកព្រឹទ្ធសភាជាច្រើនបានបដិសេធមិនបោះឆ្នោតឲ្យលោក Pita ធ្វើជានាយករដ្ឋមន្ត្រីកាលពីជុំទី១ នោះ គឺដោយសារតែគោលបំណងធ្វើវិសោធនកម្មមាត្រាទី ១១២ នៃក្រមព្រហ្មទណ្ឌ ឬច្បាប់ប្រមាថព្រះមហាក្សត្ររបស់បក្សចលនាឆ្ពោះទៅមុខ ៕

អត្ថបទ ៖ ជីវ័ន្ត

ចុចអាន ៖ ហេតុអ្វីលោក Pita បរាជ័យក្នុងការបោះឆ្នោតជ្រើសរើសជានាយករដ្ឋមន្ត្រី​ ថៃ ជុំទី១?