ចិន នឹងរារាំងអនុប្រធានាធិបតីតៃវ៉ាន់ មិនឲ្យទៅសហរដ្ឋអាមេរិក នៅខែក្រោយ

ឯកអគ្គរដ្ឋទូតចិន ប្រចាំនៅទីក្រុងវ៉ាស៊ីនតោន បាននិយាយកាលពីថ្ងៃពុធទី១៩ខែកក្កដាថា វាគឺជាអាទិភាពរបស់ចិន ក្នុងការបញ្ឈប់អនុប្រធានាធិបតីតៃវ៉ាន់ និងជាបេក្ខជនប្រធានាធិបតីឈានមុខរបស់តៃវ៉ាន់លោក William Lai ពីការទៅបំពេញទស្សនកិច្ចនៅសហរដ្ឋអាមេរិក នាខែក្រោយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសចិន បានបង្កើនសម្ពាធផ្នែកយោធានិងនយោបាយ ក្នុងរយៈពេលបីឆ្នាំចុងក្រោយ ដើ​ម្បីព្យាយាមនិងបង្ខំកោះនេះ ឲ្យទទួលយកការទាមទារអធិបតេយ្យរបស់ទីក្រុងប៉េកាំង។

ទន្ទឹមនោះ កោះតៃវ៉ាន់ នឹងរៀបចំការបោះឆ្នោតជ្រើសរើសប្រធានាធិបតីនិងសភានៅខែមករាឆ្នាំក្រោយ ដោយលោក Lai មកពីគណបក្សចម្រើនប្រជាធិបតេយ្យដែលកំពុងកាន់អំណាច កំពុងឈានមុខគេ ក្នុងការស្ទង់មតិ។

លោក Lai នឹងត្រូវឈប់សំចតជាផ្លូវការនៅសហរដ្ឋអាមេរិក ពេលធ្វើដំណើរទៅនិងមកពីប្រទេសប៉ារ៉ាហ្គាយ សម្រាប់ពិធីសម្ពោធចូលកាន់តំណែងប្រធានាធិបតីថ្មីនៅថ្ងៃទី១៥ខែសីហា។

ទោះបីជាយ៉ាងណាក៏ដោយ ឯកអគ្គរដ្ឋទូតចិនលោក Xie Feng បានប្រាប់វេទិកាសន្តិសុខ Aspen ថា “តៃវ៉ាន់គឺជាតៃវ៉ាន់របស់ចិន” ហើយថា​ ប្រទេសចង់បានការបង្រួបបង្រួម ដោយសន្តិវិធី ប៉ុន្តែក្រុមបំបែកខ្លួនតៃវ៉ាន់ កំពុងរឹងចចេស ដោយស្វែងរកការគាំទ្រពីសហរដ្ឋអាមេរិក។

លោក Xie បន្តថា “ពួកគេថែមទាំងមិនទទួលស្គាល់ថា ពួកគេជាជនជាតិចិនទៀតផង។ ដូច្នេះនេះគឺជាផ្លូវដ៏គ្រោះថ្នាក់បំផុតដែលពួកគេកំពុងដើរ។ ទង្វើ​ញុះញង់​ដោយ​ក្រុម​ផ្តាច់ខ្លួន​តៃវ៉ាន់ ​គួរ​តែ​ត្រូវ​បាន​ទប់ស្កាត់។ ឥឡូវ​នេះ អាទិភាព​សម្រាប់​យើង​គឺ​បញ្ឈប់លោក Lai ពី​ការ​ទៅ​​សហរដ្ឋ​អាមេរិក”។

តាមសេចក្តីរាយការណ៍ ប្រធានាធិបតី​តៃវ៉ាន់ លោកស្រី Tsai Ing-wen និង​រដ្ឋាភិបាល​របស់​លោកស្រី ​បានដាក់សំណើ​ចរចា​ជាមួយ​ចិន​ម្តង​ហើយ​ម្តង​ទៀត ប៉ុន្តែ​ត្រូវ​បាន​ច្រានចោល ដោយសារ​រដ្ឋាភិបាល​ក្រុង​ប៉េកាំង​ ដែលចាត់ទុក​ពួកគេ​ជាក្រុម​បំបែក​ខ្លួន៕

ប្រែសម្រួល៖ Vann Vann

ប្រភព៖ CNA

ចុចអាន៖ តៃវ៉ាន់ គំរាមបាញ់នាវាចម្បាំង និងយន្តហោះរបស់ ចិន