ព័ត៌មានអន្ដរជាតិ

កូរ៉េខាងជើង គំរាមបាញ់នុយក្លេអ៊ែរ សងសឹកអាមេរិក

បានផុស

១ year មុន

នៅ

ថ្ងៃសុក្រ ២១ កក្កដា ២០២៣

ដោយ

ប្រទេសកូរ៉េខាងជើង បានគំរាមឆ្លើយតបដោយប្រើអាវុធនុយក្លេអ៊ែរ ប្រសិនបើសហរដ្ឋអាមេរិក ដាក់ពង្រាយនាវាផ្ទុកយន្តហោះ យន្តហោះទម្លាក់គ្រាប់បែក និងនាវាមុជទឹកមីស៊ីលនៅកូរ៉េខាងត្បូង។ នេះបើយោងតាមសេចក្តីថ្លែងការណ៍មួយ ដែលចែករំលែកកាលពីថ្ងៃព្រហស្បតិ៍ទី២០ខែកក្កដា ដោយបណ្តាញសារព័ត៌មានរដ្ឋ KCNA។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីក្រុងព្យុងយ៉ាងអះអាងថា ថ្វីបើមានការព្រមានម្តងហើយម្តងទៀតក៏ដោយ ប៉ុន្តែទីក្រុងវ៉ាស៊ីនតោន និងសេអ៊ូល នៅតែបើកកិច្ចប្រជុំនៃ “ក្រុមពិគ្រោះយោបល់នុយក្លេអ៊ែរ” កាលពីថ្ងៃទី១៨ខែកក្កដា ដើម្បីពិភាក្សាអំពីការប្រើប្រាស់អាវុធនុយក្លេអ៊ែរប្រឆាំងនឹងកូរ៉េខាងជើង ដដែល។

រដ្ឋមន្ត្រីការពារជាតិកូរ៉េខាងជើង លោក Kang Sun-nam បាននិយាយនៅក្នុងសេចក្តីថ្លែងការណ៍មួយថា “កងកម្លាំងអរិភាព បានបង្កការគំរាមកំហែងនុយក្លេអ៊ែរដោយផ្ទាល់ និងច្បាស់ៗបំផុតចំពោះកូរ៉េខាងជើង ដោយការនាំយកនាវាមុជទឹកនុយក្លេអ៊ែរយុទ្ធសាស្ត្រថ្នាក់ Ohio ទៅកាន់មូលដ្ឋានប្រតិបត្តិការកំពង់ផែ ប៊ូសាន ដែលនោះជាការដាក់ពង្រាយ អាវុធនុយក្លេអ៊ែរយុទ្ធសាស្ត្រនៅលើឧបទ្វីបកូរ៉េជាលើកដំបូង ក្នុងរយៈពេល៤០ឆ្នាំ”។

រដ្ឋមន្ត្រីការពារជាតិកូរ៉េខាងជើង លោក Kang Sun-nam (រូបថត៖ KCTV )

ចំណាត់ការនេះបង្ហាញថា សេណារីយ៉ូរបស់សហរដ្ឋអាមេរិក សម្រាប់ការវាយប្រហារនុយក្លេអ៊ែរលើកូរ៉េខាងជើង បានឈានចូលដល់ដំណាក់កាលដ៏សំខាន់បំផុត។

ទន្ទឹមនោះ លោក Kang បានចោទប្រកាន់ទីក្រុងវ៉ាស៊ីនតោននិងសេអ៊ូលថា ដើរហួសបន្ទាត់ក្រហមផ្នែកយោធា ហើយអះអាងថា ការដាក់ពង្រាយនាវាមុជទឹកនុយក្លេអ៊ែរនិងទ្រព្យសម្បត្តិយុទ្ធសាស្ត្រផ្សេងទៀត គឺស្ថិតនៅក្រោមលក្ខខណ្ឌសម្រាប់ការប្រើប្រាស់អាវុធនុយក្លេអ៊ែរ ដែលបានបញ្ជាក់នៅក្នុងគោលលទ្ធិយោធារបស់កូរ៉េខាងជើង។

គោលលទ្ធិរបស់កូរ៉េខាងជើង ស្តីពីការប្រើប្រាស់អាវុធនុយក្លេអ៊ែរ គឺអនុញ្ញាតឲ្យប្រទេសនេះ អនុវត្តនីតិវិធីសកម្មភាពចាំបាច់ ក្នុងករណីមានការវាយប្រហារនុយក្លេអ៊ែរប្រឆាំងនឹងខ្លួន ឬនៅពេលវិនិច្ឆ័យឃើញថា ការប្រើប្រាស់អាវុធនុយក្លេអ៊ែរប្រឆាំងនឹងខ្លួន ជិតកើតឡើងហើយ។

គួរបញ្ជាក់ថា សេចក្តីថ្លែងការណ៍នេះធ្វើឡើង បន្ទាប់ពីទីក្រុងព្យុងយ៉ាង បាញ់មីស៊ីលផ្លោងពីរគ្រាប់ចូលទៅក្នុងសមុទ្រជប៉ុនកាលពីថ្ងៃពុធ ទី២០ ខែកក្កដា ឆ្លើយតបទៅនឹងការចូលចតរបស់នាវាមុជទឹក USS Kentucky ថ្នាក់ Ohio នៅទីក្រុងប៊ូសាននៃប្រទេសកូរ៉េខាងត្បូង៕

ប្រែសម្រួល៖ Vann Vann

ប្រភព៖ RT

ចុចអាន៖ កូរ៉េខាងជើង បាញ់មីស៊ីល២គ្រាប់ទៀត ក្រោយពេល នាវាមុជទឹកអាមេរិក មកដល់ កូរ៉េខាងត្បូង