រុស្ស៊ី គំរាមវាយប្រហារ រោងចក្រផលិតរថក្រោះអាល្លឺម៉ង់ នៅអ៊ុយក្រែន

រុស្ស៊ី​ បាន​ហៅ​ផែនការ​សាងសង់​រោងចក្រ​ផលិត​រថក្រោះ​របស់​អាល្លឺម៉ង់​នៅ​អ៊ុយក្រែន ​ថា​ជា​ “ការ​បង្កហេតុ​ជា​សកល” ថែមទាំង​ព្រមាន​ពី​ការ​វាយ​ប្រហារ​លើ​រោងចក្រនោះទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានប្រាប់សន្និសីទសារព័ត៌មាននៅទីក្រុងមូស្គូ កាលពីថ្ងៃព្រហស្បតិ៍ទី២០ខែកក្កដាថា “ប្រសិនបើត្រូវបានសាងសង់មែននោះ រោងចក្របែបនេះនឹងក្លាយជាគោលដៅស្របច្បាប់របស់កងកម្លាំងរុស្ស៊ី ដូចជាទីតាំងផ្សេងទៀតនៅក្នុងឧស្សាហកម្មការពារជាតិអ៊ុយក្រែនដែរ”។

លោកស្រីនិយាយថា កាលពីដើមខែនេះ សាជីវកម្មការពារជាតិអាល្លឺម៉ង់ Rheinmetall បានប្រកាសអំពីផែនការបើករោងចក្ររថក្រោះ នៅភាគខាងលិចប្រទេសអ៊ុយក្រែន ក្នុងរយៈពេល ១២សប្តាហ៍ខាងមុខ។

យោងតាមនាយកប្រតិបត្តិក្រុមហ៊ុន Rheinmetall លោក Armin Papperger, កម្មករអ៊ុយក្រែននឹងត្រូវបានបណ្តុះបណ្តាលដើម្បីជួសជុលគ្រឿងសឹក ដែលផលិតដោយក្រុមហ៊ុន Rheinmetall ដូចជារថយន្តប្រយុទ្ធថ្មើរជើង Marder, រថក្រោះ Leopard 2 និងកាំភ្លើងធំ PzH 2000 ជាដើម។

​លោកស្រី Zakharova ​ព្រមាន​ថា រោងចក្រ​ដែល​សាងសង់​ដោយ​ក្រុម​ការពារជាតិ​អាល្លឺម៉ង់នេះ ​នឹងបង្ហាញ​ជាព័ស្តុតាង​ចុងក្រោយ​បង្អស់ ​នៃ​ការធ្វើទំនើបកម្ម​យោធា​របស់​លោកខាងលិច​នៅ​អ៊ុយក្រែន។ ប្រសិនបើផែនការនេះក្លាយជាការពិតមែននោះ វានឹងជាការបង្កហេតុដែលអាជ្ញាធរក្រុងកៀវ និងអ្នកគាំទ្រលោកខាងលិច ទទួលខុសត្រូវ។

គួរបញ្ជាក់ជាថ្មី រោងចក្ររបស់ក្រុមហ៊ុន Rheinmetall នឹងចំណាយដើមទុនសាងសង់អស់ ២០០ លានដុល្លារ ហើយនឹងអាចបង្កើតរថក្រោះស៊េរីថ្មីៗចំនួន ៤០០ គ្រឿងក្នុងមួយឆ្នាំ ហើយ Fuchs នឹងក្លាយជាយានដំបូងបង្អស់ ដែលកើតចេញពីខ្សែសង្វាក់ផលិតកម្ម របស់រោងចក្រនេះ៕

ប្រែសម្រួល៖ Vann Vann

ប្រភព៖ Vietnam Post

ចុចអាន៖ ៣ខែទៀត អាល្លឺម៉ង់ ទៅបើករោងចក្រផលិតរថក្រោះ ដល់ អ៊ុយក្រែន