បាក់ដីកប់ភូមិនៅឥណ្ឌា ស្លាប់មនុស្ស១៦នាក់ ខណៈជាង ១០០នាក់ទៀត បាត់ខ្លួន

មនុស្សចំនួន១៦នាក់ត្រូវបាត់បង់ជីវិត និងជាង១០០នាក់ទៀតបាត់ខ្លួន បន្ទាប់ពីបំណាក់ដីដ៏ធំ វាយប្រហារភូមិមួយនៅរដ្ឋ Maharashtra ភាគខាងលិចប្រទេសឥណ្ឌា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបាក់ដី បានកើតឡើងនៅភូមិ Irshalwadi ក្នុងស្រុក Raigad កាលពីយប់ថ្ងៃពុធទី១៩ខែកក្កដា ហើយបានបំផ្លាញផ្ទះជាច្រើនខ្នង។

កិច្ចខិតខំប្រឹងប្រែងជួយសង្គ្រោះបានបន្តឡើងវិញ បន្ទាប់ពីត្រូវផ្អាកកាលពីយប់ថ្ងៃព្រហស្បតិ៍ ដោយសារភ្លៀងធ្លាក់ខ្លាំងពេក។

ស្របពេលជាមួយគ្នានោះ ក្រុមមន្ត្រីនិយាយថា កន្លែងគ្រោះមហន្តរាយ គឺស្ថិតនៅលើភ្នំមួយ ហើយស្ថានភាពដ៏លំបាក កំពុងរារាំងដល់ប្រតិបត្តិការជួយសង្គ្រោះ។

យោងតាមរដ្ឋាភិបាល Maharashtra, មនុស្ស១០៩នាក់ នៅតែជាប់នៅក្រោមកម្ទេចកម្ទី។

គួរបញ្ជាក់ថា រដ្ឋជាច្រើនក្នុងប្រទេសឥណ្ឌា បានជួបប្រទះភ្លៀងធ្លាក់ខ្លាំងក្នុងរយៈពេលពីរសប្តាហ៍ចុងក្រោយនេះ ដែលបង្កឲ្យមានគ្រោះទឹកជំនន់ និងការបាក់ដី។

លើសពីនេះ នាយកដ្ឋានអាកាសធាតុរបស់ប្រទេសឥណ្ឌានិយាយថា ភ្លៀងធ្លាក់ខ្លាំងនឹងបន្តក្នុងរយៈពេលប៉ុន្មានថ្ងៃខាងមុខ នៅផ្នែកខ្លះនៃរដ្ឋ Maharashtra រួមទាំងស្រុក Raigad ផងដែរ៕

ប្រែសម្រួល៖ Vann Vann

ប្រភព៖ BBC

ចុចអាន៖ ទឹកជំនន់នៅឥណ្ឌា សម្លាប់មនុស្ស​កើនដល់ជាង ៦០នាក់