បក្សភឿថៃ បញ្ជូនក្រុមការងារទៅបញ្ចុះបញ្ចូលសមាជិកសភា ឲ្យបោះឆ្នោតគាំទ្រធ្វើជានាយករដ្ឋមន្ត្រី

គណបក្សភឿថៃគ្រោងនឹងបញ្ជូនក្រុមដែលដឹកនាំដោយសមាជិកសភាលោក Suriya Juangroongruangkit ទៅបញ្ចុះបញ្ចូលសមាជិកព្រឹទ្ធសភាដែលតែងតាំងដោយយោធា ឲ្យបោះឆ្នោតគាំទ្របក្សរបស់ខ្លួនដើម្បីបង្កើតរដ្ឋាភិបាលថ្មី ។

មេដឹកនាំគណបក្សលោក Cholnan Srikaew បាននិយាយទៅកាន់អ្នកសារព័ត៌មានកាលពីថ្ងៃអាទិត្យ មុនពេលចូលរួមកិច្ចប្រជុំជាមួយគណបក្ស Chart Thai Pattana ថា ក្រុមការងាររបស់គណបក្សភឿថៃ នឹងចុះទៅជួបសមាជិកព្រឹទ្ធសភានីមួយៗដាច់ដោយឡែកពីគ្នា ដើម្បីនិយាយទៅកាន់ពួកគេអំពីការបោះឆ្នោតគាំទ្រសម្រាប់បេក្ខភាពនាយករដ្ឋមន្ត្រីរបស់គណបក្សភឿថៃ ។

ស្របពេលជាមួយគ្នានេះ លោក Srikaew ​ក៏​​រំពឹងផងដែរ​ថា ​បេក្ខជនមកពី​បក្ស​ភឿ​ថៃ​នឹង​ទទួល​បាន​សំឡេង​ច្រើន​ជាង ៤០០ ដើម្បីឲ្យដាច់ស្រេចមិនចាំបាច់​ទាមទារ​សំឡេង​គាំទ្រ​បន្ថែម​ពី​ព្រឹទ្ធសភា​ឡើយ ដែលតម្រូវឲ្យគណបក្សនយោបាយត្រូវមានសំឡេងចំនួន ៣៧៦ ពីសភាតំណាងរាស្រ្ត និងព្រឹទ្ធសភាដើម្បីបង្កើតរដ្ឋាភិបាល ។

ពាក់ព័ន្ធនឹងបញ្ហានេះដែរ បេក្ខជននាយករដ្ឋមន្ត្រីមកពីបក្សភឿថៃលោក Srettha Thavisin បាននិយាយថា គណបក្សភឿថៃនឹងប្រឆាំងដាច់ខាតចំពោះគោលបំណងកែប្រែច្បាប់ប្រមាថព្រះមហាក្សត្រ មិនដូចបក្សចលនាឆ្ពោះទៅមុខរបស់លោក Pita  Limjaroenrat ឡើយ ប្រសិនបើបក្សនេះទទួលបានសំឡេងគាំទ្រឲ្យដឹកនាំរដ្ឋាភិបាលថ្មី ។

គួរបញ្ជាក់ថា សម័យអង្គុយប្រជុំរួមគ្នានៃរដ្ឋសភា និងព្រឹទ្ធសភា សម្រាប់ការបោះឆ្នោតជ្រើសរើសនាយករដ្ឋមន្ត្រីថ្មីក្នុងជុំទី ២ នឹងប្រព្រឹត្តទៅនៅវេលាម៉ោង ៩ និង ៣០ ព្រឹកថ្ងៃព្រហស្បតិ៍ ទី២៧ ខែកក្កដា ខណៈលោក Pita ត្រូវបានសភាបោះឆ្នោតដកសិទ្ធិមិនឲ្យឈរឈ្មោះ ២ ដង ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ លោក Pita ចេញមុខនិយាយទៅកាន់ប្រជាជន ថៃ ក្រោយអស់សិទ្ធិធ្វើជា​នាយករដ្ឋមន្ត្រី